पोलिस चौकीसमोर पिडीतेचा संताप

पोलिस चौकीसमोर पीडितेचा संताप
समाजमाध्यमांवर व्हिडिओ व्हायरल
अंबरनाथ, ता. १७ (वार्ताहर) : मामाला भेटायला जात असताना एका तरुणीला रस्त्यात अडवून तिच्याकडून मोबाईल आणि पैसे जबरीने खेचले, तसेच तिला मारहाण केल्याची घटना अंबरनाथमध्ये घडली आहे. याबाबतची तक्रार करण्यासाठी ही तरुणी पोलिस चौकीत गेली होती; मात्र पोलिसच चौकीत उपस्थित नसल्याने या तरुणीने भररस्त्यात चौकीसमोर संताप व्यक्त केला. या वेळी रिकाम्या असलेल्या चौकीला पाहून आता न्याय कोणाकडे मागायचा, असा उद्विग्न सवाल या तरुणीने केला आहे. तसेच याबाबत पोलिसांच्या कार्यावर प्रश्नचिन्ह उपस्थित केले. या तरुणीचा हा व्हिडिओ समाजमाध्यमांवर व्हायरल झाला आहे.
अंबरनाथ पश्चिम रेल्वेस्थानकाजवळ पोलिस चौकीत बुधवारी (ता. १६) ही घटना संध्याकाळी साडेसात ते आठच्या सुमारास घडली. ही तरुणी तिच्या मामाला भेटायला जात असताना तिला भगतसिंगनगर येथे तीन-चार तरुणांनी अडवून तिच्याजवळून पैसे, मोबाईल जबरीने घेतले. तसेच तिला मारहाण केल्याचे ही तरुणी ओरडून ओरडून सांगत आहे; मात्र या वेळी तिची तक्रार लिहून घेण्यासाठी पोलिस चौकीत कोणीच नसल्याने तिने संताप व्यक्त केला. तरुणी झालेल्या मारहाणीचे व्रण महिलांना दाखवत असल्याचे त्या व्हिडिओत दिसत आहे. या वेळी बघ्यांची गर्दी झाली होती; मात्र तिला मदत करायला कोणीच पुढे गेले नाहीत. याबद्दलही समाजावरही रोष व्यक्त करण्यात येत आहे. दरम्यान, शहरात कायदा- सुव्यवस्था राहिली नसल्याने नागरिकांनी पोलिसांच्या कारभारावर प्रश्न उपस्थित केला आहे.