महावितरणाच्या अदानी स्मार्ट मीटरला शिवसेनेचा विरोध

महावितरणाच्या अदाणी स्मार्ट मीटरला शिवसेनेचा विरोध
माणगाव, ता. १७ (बातमीदार) : सध्या माणगाव तालुक्यासह रायगड जिल्ह्यात नागरिकांना वीजपुरवठा करणाऱ्या महावितरण, महापारेषण कंपन्यांकडून जुने वीज मीटर बदलून अदाणी कंपनीचे नवीन स्मार्ट मीटर बसवण्यात येत आहेत, मात्र माणगाव तालुक्यातील शहरी तसेच ग्रामीण भागातील बहुसंख्य नागरिकांनी या मीटरला विरोध केला आहे. याकरिता शिवसेना (उद्धव बाळासाहेब ठाकरे) पक्षाकडून माणगाव तहसीलदार, माणगाव पोलिस निरीक्षक व महावितरण अभियंता यांना संबंधित मीटरला विरोध असल्याचे निवेदन देण्यात आले आहे.
माणगावमध्‍ये महावितरणाच्या अदाणी स्मार्ट मीटरला शिवसेनेकडून विरोध करण्‍यात येत आहे. शिवाय नागरिकांनीदेखील या मीटरला विरोध केला आहे. त्‍यामुळे महावितरण कंपनीने या निर्णयाबद्दल विचार करावा, असे शिवसेनेकडून सांगण्यात येत आहे. त्‍याअनुषंगाने शिवसेनेकडून माणगावमधील तहसील कार्यालय, पोलिस प्रशासनासह महावितरण कंपनीला मीटरविरोधात निवेदन दिले आहे.
या वेळी शिवसेना जिल्हा चिटणीस डॉ. अमेय (परेश) उभारे, विद्युत वितरण कंपनी अभियंता करंदेकर, माजी सभापती तथा नगरसेवक अजित तार्लेकर, माणगाव शहर संघटक अनिल सोनार, युवासेना शहर अधिकारी अजिंकेश जाधव, युवासेना पदाधिकारी वैभव शेठ, बेबीन नायर, रविश गोटेकर, इब्राहिम करेल, ऋषिकेश मोरे, अथर्व हाटे, हार्दिक काते, अविष्कार गायकवाड, शारुख अफवारे आदी उपस्थित होते. या वेळी नगरसेवक अजित तार्लेकर व शिवसेना जिल्हा चिटणीस डॉ. अमेय (परेश) उभारे म्हणाले की, ग्रामीण व शहरी भागातील सर्वसामान्य नागरिक यांची मानसिकता ओळखून, त्यात काही त्रुटी असल्यास त्यांना समुपदेशन करून त्‍यानंतर स्मार्ट मीटर बसवावे. यामध्ये मीटरचे फायदे- तोटे हे वीज वितरण कंपनीकडून नागरिकांना समजले पाहिजेत. अन्यथा नागरिकांचा अदाणी स्मार्ट मीटरला विरोध असल्यास शिवसेना उद्धव बाळासाहेब ठाकरे पक्ष सर्वसामान्यांच्या पाठीशी उभा राहून तीव्र आंदोलन छेडेल, असा इशारादेखील या वेळी देण्यात आला. तर आम्ही माणगाव तालुक्यातील नगर पंचायत कार्यक्षेत्रातील तसेच माणगाव तालुक्यातील ग्रामीण भागातील नागरिकांपर्यंत तेथील नगरसेवक, प्रशासकीय अधिकारी, ग्रामीण भागातील लोकप्रतिनिधी, सरपंच व ग्रामविकास अधिकारी यांच्यामार्फत पोहोचून स्मार्ट मीटरचे फायदे- तोटे तसेच मीटर कसे आवश्यक आहेत, याबाबत प्रत्यक्ष भेट व सोशल मीडियाच्या माध्यमातून जनजागृती करणार आहोत, असे महावितरणचे अभियंता सनिल करंदेकर यांनी सांगितले.