इमारतीवरून पडून कामगाराचा मृत्यू

इमारतीवरून पडून कामगाराचा मृत्यू

अंबरनाथ ता. २० (वार्ताहर) ः अंबरनाथमध्ये निर्माणाधीन इमारतीवरून पडून कामगाराचा मृत्यू झाल्याची घटना शनिवारी (ता. १९) सकाळच्या सुमारास घडली. या घटनेनंतर संतप्त कुटुंबीयांनी या कामगाराचा मृतदेह रुग्णालयातून इमारतीबाहेर आणून ठेवला होता. दरम्यान, यासंदर्भात शिवाजीनगर पोलिस ठाण्यात अकस्मात मृत्यूची नोंद करण्यात आली आहे.
अंबरनाथ पूर्व कानसई कॉलेजच्या मागच्या बाजूला इमारतीचे बांधकाम सुरू आहे. या इमारतीवर अंबरनाथ पश्चिमेच्या कमलाकरनगरमध्ये राहणारे अनिल गौरीशंकर कश्यप हे ४५ वर्षीय कामगार सुतारकाम करीत होते. सातव्या स्लॅबचे काम सुरू असताना ते पाय घसरून मागच्या बाजूला पडले आणि त्यात त्यांचा मृत्यू झाला. या घटनेनंतर त्यांना तातडीने उल्हासनगरच्या मध्यवर्ती रुग्णालयात नेण्यात आले; मात्र तेथे त्यांना मृत घोषित करण्यात आले. बांधकामाशी संबंधितांनी आपला फोनही उचलला नाही, असा आरोप कश्यप यांच्या कुटुंबीयांनी केला. तसेच मध्यवर्ती रुग्णालयातून त्यांचा मृतदेह या इमारतीबाहेर आणून ठेवला होता. शिवाजीनगर पोलिसांनी या ठिकाणी धाव घेत अकस्मात मृत्यूची नोंद केल्याची माहिती वरिष्ठ पोलिस निरीक्षक रमेश पाटील यांनी दिली.