कर्ज फेडण्यासाठी स्वतःच्या घरातच घरफोडी
कर्ज फेडण्यासाठी स्वतःच्या घरातच घरफोडी
४८ तासांत आरोपीला बेड्या; रोहा पोलिसांची कामगिरी
रोहा, ता. २३ (बातमीदार) ः मित्रांकडून घेतलेले कर्ज वेळेवर अदा न केल्याने अनेकांकडून पैशांसाठी वारंवार तगादा लावण्यात येत होता. त्यामुळे या कर्जमुक्तीचा सोपस्कार मार्ग म्हणून येथील २९ वर्षीय आरोपीने स्वतःच्या घरात घरफोडी करून साडेतीन लाख रुपये किमतीचे दागिने व रोख रक्कम चोरली. त्यानंतर आरोपी पती सुरुवातील गुन्हा कबुल केला नाही, मात्र पोलिसांनी सर्व पुरावे दिल्यावर अखेर गुन्ह्याची कबुली दिली. रोहे पोलिसांनी सीसीटीव्ही कॅमेरे, श्वान पथक आणि बुद्धी कौशल्याच्या जोरावर अवघ्या ४८ तासात आरोपीला बेड्या ठोकल्या. विशेष म्हणजे या घटनेत पत्नी फिर्यादी असून, पती मात्र आरोपीच्या पिंजऱ्यात उभा आहे.
ही घटना रोहा शहरालगत असलेल्या भुवनेश्वर येथील वैभवनगरमध्ये रविवारी सायंकाळी साडेसहा वाजता घडली. घरफोडीची माहिती मिळताच परिसरात खळबळ उडाली. घरमालक महिला मेहराज मेहबूब शेख यांनी रोहा पोलिसांत तातडीने तक्रार दाखल केली. पोलिसांनी घटनास्थळी धाव घेऊन तत्काळ तपासाला सुरुवात केली. सीसीटीव्ही फुटेजची पाहणी, श्वान पथकाची मदत आणि तांत्रिक तपासाद्वारे पोलिसांनी गुन्ह्याचा मागोवा घेतला. श्वान पथकातील कुत्रा सतत घरातच फेऱ्या घालत असल्यामुळे पोलिसांना शंका आली. यानंतर पोलिसांनी फिर्यादी महिलेच्या पतीची सखोल चौकशी केली. सुरुवातीला “तो मी नव्हेच” अशी भूमिका घेणाऱ्या मेहबूबने पोलिसांचा हिसका दाखवताच अखेर गुन्ह्याची कबुली दिली. चौकशीतून उघड झाल्यानुसार, मेहबूब शेख याने आपल्या मित्रांकडून घेतलेले कर्ज फेडण्यासाठी काही मार्ग सापडत नसल्याने स्वतःच्या घरातच चोरीचा बनाव रचला. पत्नीला तो दुचाकीवर बसवून कुंडलिका नदीजवळील गार्डनमध्ये फिरायला घेऊन गेला. ‘‘मंच्युरियन घेऊन येतो’’ असे सांगून तो तिला तिथेच थांबवून घरी आला आणि घरातील दागिने व रोख रक्कम चोरून मुद्देमाल घरातच लपवून ठेवला. नंतर गार्डनमध्ये परत जाऊन पत्नीसोबत सामान्यपणे वागू लागला. या सगळ्या प्रकाराचा पोलिसांनी छडा लावला. चौकशीत गुन्ह्याची कबुली मिळाल्यानंतर पोलिसांनी घरातून चार लाख ३३ हजार रुपये किमतीचा मुद्देमाल हस्तगत केला आणि मेहबूब शेख याला अटक केली. या प्रकरणात विशेष बाब म्हणजे फिर्यादी ही पत्नी असून, आरोपी तिचा पती आहे. त्यामुळे पोलिस चौकशीत पत्नीवर स्वतःच्याच डोक्यावर हात मारण्याची वेळ आली. रोहा पोलिसांनी केलेल्या जलद तपास व अचूक कामगिरीबद्दल स्थानिक नागरिकांकडून त्यांचे कौतुक होत असून, गुन्हेगारीवर वचक ठेवण्यासाठी पोलिसांची ही तत्परता महत्त्वाची असल्याचे मत व्यक्त होत आहे.
सकाळ+ चे सदस्य व्हा
ब्रेक घ्या, डोकं चालवा, कोडे सोडवा!
शॉपिंगसाठी 'सकाळ प्राईम डील्स'च्या भन्नाट ऑफर्स पाहण्यासाठी क्लिक करा.
Read latest Marathi news, Watch Live Streaming on Esakal and Maharashtra News. Breaking news from India, Pune, Mumbai. Get the Politics, Entertainment, Sports, Lifestyle, Jobs, and Education updates. And Live taja batmya on Esakal Mobile App. Download the Esakal Marathi news Channel app for Android and IOS.