खारघरमध्ये फेरीवाल्यांचे पदपथावर अतिक्रमण

खारघरमध्ये फेरीवाल्यांचे पदपथावर अतिक्रमण
व्यापाऱ्यांमध्ये तीव्र नाराजी; प्रशासनाच दुर्लक्ष
खारघर, ता. २३ (बातमीदार) : खारघरमधील सेक्टर-१२ परिसरात रस्ते व पदपथांवर फेरीवाल्यांनी अतिक्रमण केल्यामुळे स्थानिक व्यापाऱ्यांच्या व्यवसायावर प्रतिकूल परिणाम झाला आहे. ग्राहक पाठ फिरवू लागल्याने व्‍यावसायिकांसमोर मोठ्या आर्थिक अडचणी निर्माण झाल्या आहेत. पालिका प्रशासनाने याकडे लक्ष देऊन त्वरित कारवाई करावी, अशी मागणी व्यापारी वर्गाकडून होत आहे.
नवरंग सर्कलपासून गोखले शाळा, शिवाजी चौक मार्गे उत्सव चौकापर्यंतच्या मुख्य रस्त्यावर किराणा, कपड्याचे रेडिमेड दुकान, स्वीट मार्ट, ज्वेलर्स, फूटवेअर, हार्डवेअर, साडी सेंटर आदी दुकाने आहेत. बहुतांश व्यापारी हे गाळे भाड्याने घेऊन व्यवसाय करत असून, त्यांचे मासिक भाडे काही ठिकाणी ५०,००० ते एक लाख रुपयांपर्यंत आहे, मात्र दुकानासमोरील पदपथ फेरीवाल्यांनी व्यापल्याने ग्राहकांना दुकानात येणे कठीण झाले आहे.
....................
व्यवसाय खिशातून चालवावा लागतो
या अडथळ्यांमुळे ग्राहकांचे प्रमाण घटल्याने व्यापाऱ्यांना फारसा व्यवसाय होत नाही. परिणामी दुकानांचे भाडे व इतर खर्च व्यापाऱ्यांना स्वतःच्या खिशातून भरावे लागत आहेत. फेरीवाल्यांनी पदपथ व्यापल्यामुळे आमच्या व्यवसायावर मोठा परिणाम होत आहे. पालिकेने कारवाई करावी, अशी मागणी स्थानिक व्यापारी रमेश चौधरी यांनी केली.
................
कोणतीही ठोस कारवाई नाही
व्यापाऱ्यांच्या म्हणण्यानुसार, अनेक तक्रारी दिल्यानंतरही पालिका प्रशासनाने फेरीवाल्यांविरोधात कोणतीही ठोस कारवाई केलेली नाही. परिणामी व्यापाऱ्यांमध्ये संतापाचे वातावरण आहे. काही व्यापाऱ्यांनी तर यामुळे मालमत्ता कर न भरण्याचा इशारा दिला आहे.
...............
कोटा
नागरिकांना पदपथ मोकळा मिळावा यासाठी सेक्टर-१२ आणि इतर सेक्टरमध्ये नियमितपणे कारवाई केली जात आहे. विशेषतः सेक्टर-१२ साठी स्वतंत्र पथक नेमले असून, दैनंदिन कारवाई सुरू आहे.
- जितेंद्र मढवी, प्रभाग अधिकारी