जुन्या वादातून कुटुंबीयांना मारहाण

भिवंडी, ता. २४ (वार्ताहर) : शहरातील कामतघर रस्त्यावरील हनुमाननगर परिसरात जुन्या वादातून दोन कुटुंबांमध्ये हाणामारी झाली. या प्रकरणात दोन वेगवेगळे गुन्हे दाखल करण्यात आले असून, तीन जण जखमी झाले आहेत. पोलिसांनी पाच जणांविरोधात गुन्हा दाखल केला असून, यामध्ये तीन महिलांचा समावेश आहे.

साक्षी मिश्रा व त्यांच्या दिराची पत्नी पिंकू अशा दोघी मंगळवारी (ता. २२) सायंकाळी चार वाजता आपल्या वडापावच्या हातगाडीजवळ उभ्या होत्या. त्यावेळी साक्षी यांचे दीर शिवम यासोबत झालेल्या भांडणाचा राग मनात ठेऊन पंकज खैरवाल, शिवाणी खैरवाल व मित्र पंकज अशा तिघांनी दोघींना शिवीगाळ करत लाकडी बांबूने मारहाण केली. यात साक्षी यांच्या उजव्या कानातील सोन्याची बाली व सोनसाखळी गहाळ झाली. याप्रकरणी शहर पोलीस ठाण्यात तक्रार दाखल करण्यात आली आहे. याप्रकरणी साक्षीने दिलेल्या तक्रारीवरून भिवंडी शहर पोलिस ठाण्यात तिघांविरोधात गुन्हा दाखल केला आहे. याच कुटुंबातील शिवम बुधवारी सकाळी साडेसात वाजता मंदिरातून घरी जात असताना कमला खैरवार व त्यांची बहीण आरती या दोघींनी लाकडी दांडक्याने मारहाण केली. शिवम यांच्या तक्रारीवरून शहर पोलिस ठाण्यात दोघांविरोधात गुन्हा दाखल केला आहे. दोन्ही गुन्ह्यांचा तपास पोलिस उपनिरीक्षक विजय कडाले करत आहेत.