भिवंडीत मटका अड्ड्यावर छापा

भिवंडी, ता. २४ (वार्ताहर) : भिवंडी शहरात अनेक भागांत सुरू असलेल्या मटका जुगार अड्ड्यांविरोधात नेहमीच तुटपुंजी कारवाई होते. मात्र, मटका व्यवसाय पुन्हा नव्याने सुरू होत असल्याने पोलिसांच्या भूमिकेवर प्रश्न उपस्थित होत होते. मंगळवारी (ता. २२) सायंकाळी साडेचारच्या सुमारास शहर पोलिसांनी धामणकर नाका येथील प्रवीण अग्रवाल यांच्या इमारतीच्या तळमजल्यावर सुरू असलेल्या मटका अड्ड्यावर छापा टाकून मोठी कारवाई केली.
धामणकर नाका या अत्यंत वर्दळीच्या परिसरात बिरजू पावभाजीजवळील एका इमारतीच्या तळमजल्यावर सुरू असलेल्या मटका जुगार अड्ड्यावर भिवंडी शहर पोलिसांनी छापा टाकला. छाप्यावेळी पाच कर्मचारी हे ६९ ग्राहकांकडून मटका पावत्या लिहताना आढळून आले. पोलिसांनी त्या ठिकाणाहून ५१ हजार ७२० रुपयांची रोकड जप्त केली आहे. सर्व ७४ जणांविरोधात गुन्हा दाखल केला आहे. या कारवाईमुळे शहरातील अन्य अड्ड्यांवरही कारवाईची शक्यता निर्माण झाली आहे. मात्र, यानंतर ही कारवाई कायमस्वरूपी प्रभावी ठरणार का, हे पाहणे महत्त्वाचे ठरणार आहे.