पुस्तक हा श्वास आहे एकाकी जीवनाचा एकमेव मित्र आहे.

‘पुस्तक हा एकाकी जीवनाचा मित्र’
सुरेखा कुरकुरे यांचे प्रतिपादन
विरार, ता. २४ (बातमीदार) ः रोज एक पुस्तकाचे पान तरी वाचले पाहिजे. डॉ. बाबासाहेब आंबेडकरांनी सांगितले आहे वाचाल तर वाचाल. असे म्हणतात पुस्तक हा श्वास आहे एकाकी जीवनाचा एकमेव मित्र आहे, असे प्रतिपादन साहित्यिक कवी सुरेखा कुरकुरे यांनी केले. विरार येथील महानगरपालिकेच्या वाचनालयातर्फे वाचक मेळाव्याचे आयोजन केले होते. यावेळी त्या बोलत होत्या.
या कार्यक्रमात कोकण विभाग ग्रंथालय समितीचे अध्यक्ष दिलीप कोरे, कोकण विभाग ग्रंथालय संघाचे सदस्य रमण पाटील, साहित्यिक आणि कवी सुरेखा कुरकुरे, उत्कर्ष विद्यालयाच्या प्राचार्य मुग्धा लेले व इतर मान्यवर उपस्थित होते.
सुरेखा कुरकुरे म्हणाल्या की, लहान मुलं संवेदनशील असतात. घरात मोठी माणसे वाचन करत असतील तर मुलांना वाचनाची गोडी निर्माण होते. वाचनाने माणूस शंभर टक्के यशस्वी होण्याचा मार्ग आहे. वाचनात दोन प्रकार आहेत. प्रकट वाचन आणि मुकवाचन. प्रकट वाचन म्हणजे मोठ्याने वाचणे. स्वतः साठी व दुसऱ्यांसाठी. आवाजातील चढ-उतार, व्याकरण, बोलण्यातून ओघवती शैली जाणवली पाहिजे म्हणजे लक्षात राहण्यास मदत होते. मुक वाचन म्हणजे स्वतःच्या आनंदासाठी मनात वाचणे.
प्राचार्या मुग्धा लेले यांनी सांगितले कि, मुलांनी शिक्षणाबरोबरच अवांतर वाचन केले पाहिजे. सध्या एआयचं युग आहे. चॅटजीपीटीवर सर्व माहिती मिळते. पण, सर्व बरोबर असतेच असं नाही मॅन्युअल इंटेलिजन्स फार महत्त्वाचा आहे. पुस्तक वाचली पाहिजे. प्रत्येकाच्या घरात एक लायब्ररी पाहिजे. दिलीप कोरे, रमण पाटील, हरिशचंद्र मिठबावकर यांची यावेळी भाषणे झाली.
या कार्यक्रमाला विद्यार्थी, जेष्ठ नागरिक, युवा वर्ग तसेच ग्रंथालयाच्या स्वाती घरत, अमित मोदी, अमित पाटील व कर्मचारी उपस्थित होते.