दारावरून सोनसाखळीची चोरी

दारावरून सोनसाखळीची चोरी
उरण पोलिसांकडून नेपाळी तरुणाला अटक
उरण, ता.२४(वार्ताहर)ः घराचे दार ठोठावत उरण कोटनाका येथे महिलेच्या गळ्यातील सोनसाखळीची चोरी करण्यात आली होती. या प्रकरणात उरण पोलिसांनी नेपाळमधील मोहीत कोहलीला (वय २६ ) बेड्या ठोकल्या आहेत. त्याच्यावर नेरुळ, उरण तसेच पनवेलमध्ये सोनसाखळी चोरीचे पाच गुन्हे दाखल आहेत.
कोटनाका येथे राहणारी कुसुम तांडेल (वय ६६) यांच्या घराबाहेरच गळ्यातील सोनखेचण्यात आली होती. या प्रकरणी उरण पोलिस ठाण्यात तक्रार दखल झाल्यानंतर उरण पोलिस ठाण्याचे वरिष्ठ पोलिस निरीक्षक जितेंद्र मिसाळ यांच्या मार्गदर्शनाखाली पथकाने तपास सुरु केला. यावेळी आरोपी उरण नवघर परिसरात येणार असल्याची माहिती पोलिसांना मिळाली. त्यानुसार मोहीत कोहलीला (वय २६) ताब्यात घेण्यात आले. पण एक महिला तसेच साथीदार मात्र फरार आहे.
--------------------------------------
मुद्देमाल हस्तगत
आरोपी नेपाळचा रहिवासी आहे. त्याने गुन्हा केल्याची कबुली दिली. तसेच अटक केलेल्या सोनसाखळी चोराकडून साडेतीन लाखांची सोनसाखळी जप्त करण्यात आली आहे. गुन्ह्यातील चोरीचा मुद्देमाल पोलिसांनी हस्तगत करण्यात आला असून आरोपीला पोलिस कोठडी ठेवले असल्याची माहिती पोर्ट विभाग सहाय्य आयुक्त विशाल नेहुल यांनी दिली.