गुजराती पाट्यांची पालघरमध्ये तोडफोड

गुजराती पाट्यांची
पालघरमध्ये तोडफोड
मनोर, ता. २४ : मुंबई-अहमदाबाद महामार्गावरील गुजराती पाट्यांविरोधात महाराष्‍ट्र नवनिर्माण सेनेने गुरुवारी जोरदार आंदोलन केले. पालघर तालुक्यातील हालोली गावाच्या हद्दीत आंदोलन करून हॉटेलवरील गुजराती पाट्यांची तोडफोड केली. चारोटी भागातील हॉटेलमालकांना समज दिल्यानंतर त्यांनी गुजराती भाषेतील पाट्या काळ्या रंगाच्या प्लास्टिक कपड्याने झाकून ठेवल्या.

‘पालघरमध्ये हॉटेलांवर गुजराती पाट्या’ ही बातमी गुरुवारी प्रसिद्ध करून ‘सकाळ’ने लक्ष वेधले होते. याची दखल घेऊन मनसेच्या पालघर जिल्ह्यातील पदाधिकाऱ्यांनी महामार्गावरील गुजराती भाषेत पाट्या असलेल्या हॉटेलविरोधात आठवडाभरात मराठी पाट्या न लावल्यास खळखट्याकचा इशारा रस्ते आस्थापना शाखेचे जिल्हा अध्यक्ष ज्ञानेश पाटील यांनी दिला.

महामार्गावरील हालोली येथील आंदोलनात मनसेचे सुनील राऊत, संदीप किणी, निशांत धोत्रे, मंगेश घरत आणि कार्यकर्त्यांनी भाग घेतला होता. चारोटी भागातील आंदोलन रस्ते आस्थापना शाखेचे ज्ञानेश पाटील यांच्या नेतृत्वात करण्यात आले.
-------------