लाचखोरी अधिकारी जाळ्यात

कल्याण महापालिकेतील
तीन अधिकारी जाळ्यात

एकाच दिवशी ‘लाचलुचपत’ची कारवाई, खळबळ
सकाळ वृत्तसेवा
डोंबिवली, ता. २४ : ठाणे लाचलुचपत प्रतिबंधक विभागाने एकाच दिवशी कारवाई करून कल्याण डोंबिवली महापालिकेतील तीन अधिकाऱ्यांना अटक केल्याने खळबळ उडाली आहे. पालिकेचे घनकचरा विभागातील मुख्य स्वच्छता अधिकारी वसंत देगलूरकर आणि प्रभारी स्वच्छता अधिकारी सुदर्शन जाधव, तर दुसऱ्या कारवाईत जल आणि मलनिस्सारण विभागातील सहाय्यक अभियंता रवींद्र आहिरे यांना रंगेहाथ पकडण्यात आले आहे. आहिरे यांच्यावर महात्मा फुले पोलिस ठाण्यात गुन्हा दाखल झाला आहे. या कारवाईमुळे महापालिकेतील भ्रष्‍टाचार पुन्हा चव्‍हाट्यावर आला आहे.

महापालिका क्षेत्रातील घनकचरा विभागात वसंत देगलूरकर हे मुख्य स्वच्छता अधिकारी म्हणून कार्यरत आहेत. स्वच्छता विभागातील कर्मचारी आजारी होता. त्याला पुन्हा कामावर हजर करून घेण्यासाठी या दोन्ही अधिकाऱ्यांनी त्याच्याकडे २० हजार रुपयांच्या लाचेची मागणी केली होती. याप्रकरणी कर्मचाऱ्याने लाचलुचपत प्रतिबंधक खात्याच्या ठाणे विभागाकडे तक्रार केली होती. या तक्रारीनुसार गुरुवारी लाचलुचपत प्रतिबंधक विभागाच्या ठाणे पथकाने प्राप्त तक्रारीच्या आधारे सापळा रचला होता. सर्वोदय मॉल परिसरात महापालिकेचे घनकचरा विभागाचे कार्यालय आहे. याच कार्यालयात या दोघा अधिकाऱ्यांना २० हजार रुपयांची लाच घेताना रंगेहाथ पकडले आहे.
दुसऱ्या घटनेत महापालिकेच्या जल आणि मलनिस्सारण विभागातील सहाय्यक अभियंता रवींद्र आहिरे याला ४० हजार रुपयांची लाच घेताना रंगेहाथ अटक करण्यात आली आहे. त्याने पेट्रोल पंप उघडण्यासाठी ना-हरकत प्रमाणपत्र देण्याच्या बदल्यात पैशाची मागणी केली होती. बिर्ला कॉलेजजवळील परिसरातून त्याला अटक करण्यात आली आहे.
कल्याण डोंबिवली महापालिकेतील घनकचरा विभाग आणि जल आणि मलनिस्सारण विभाग भ्रष्‍टाचाराबाबत नेहमीच बदनाम राहिले आहे. या ताज्या कारवाईनंतर हे विभाग पुन्हा चर्चेत आले आहेत.
----
आतापर्यंत ४७ जणांना अटक
तीन अधिकाऱ्यांच्या अटकेनंतर महापालिकेतील भ्रष्ट कारभाराचे पितळ पुन्हा उघडे पडले आहे. महापालिकेत आतापर्यंत ४७ अधिकारी, कर्मचाऱ्यांना लाच घेताना पकडले आहे.