घराचा ताबा घेण्यासाठी महिलेकडून क्रेनचा वापर

घराचा ताबा घेण्यासाठी
महिलेकडून क्रेनचा वापर

भाईंदर, ता. २४ (बातमीदार) : पतीच्या तिसऱ्या मजल्यावरील घराचा ताबा घेण्यासाठी त्याच्या दुसऱ्या पत्नीने चक्क क्रेनचा वापर केल्याची धक्कादायक घटना मिरा रोडमध्ये घडली आहे. याप्रकरणी काशिगाव पोलिस ठाण्यात पाच महिलांसह सात जणांवर गुन्हा दाखल करण्यात आला आहे.

मिरा रोड येथील अपना घर गृहसंकुलातील एका इमारतीत शारगुल खान आपल्या पहिल्या पत्नीसह तिसऱ्या मजल्यावर राहतात. खान यांचे दोन विवाह झाले आहेत. पहिल्या पत्नीचे नाव रोशनी आणि दुसऱ्या पत्नीचे नाव शीतल आहे. खान राहत असलेल्या घराच्या ताब्यावरून काही दिवसांपासून तिघांत वाद सुरू होता.

घराचा ताबा मिळत नसल्यामुळे शीतलने बुधवारी (ता. २३) रात्री क्रेनच्या मदतीने तिसऱ्या मजल्यावरील गॅलरीतून घरात प्रवेश केला. तिच्यासोबत आणखी चार महिला व दोन पुरुष होते. घरात प्रवेश करून या सर्वांनी रोशनीला मारहाण केली आणि घराबाहेर काढले. त्यात ती जखमी झाली असून, तिच्यावर सरकारी रुग्णालयात उपचार सुरू आहेत. रोशनीने याप्रकरणी काशिगाव पोलिस ठाण्यात तक्रार दाखल केली.
पोलिसांनी शीतलसह एकंदर सात जणांवर गुन्हा नोंदवून शीतलला अटक करण्यासाठी एक पथक गुरुवारी सकाळी घरी पाठवले; मात्र तोपर्यंत शीतल तेथून फरार झाली.
----
भाड्याने आणली क्रेन
शीतलने वापरलेल्या क्रेनचा वापर बहुमजली इमारतीमधील वातानुकूलित यंत्र बसविण्यासाठी केला जातो. ही कामे साधारणपणे रात्री केली जातात, हे शीतलला माहिती होते. त्यामुळे तिने घरात शिरण्यासाठी क्रेन भाड्याने बोलावली, अशी माहिती काशिगाव पोलिस ठाण्याचे वरिष्ठ पोलिस महेश तोगडवाड यांनी दिली.