प्रवेशबंदीचे आदेश पायदळी

खारघर, ता. २७ (बातमीदार) : पावसाळी पर्यटनासाठी आकर्षणाचा केंद्रबिंदू असलेल्या खारघरमधील धबधब्यांवर अपघातांच्या पार्श्वभूमीवर बंदी घालण्यात आली आहे, मात्र पावसाळी पर्यटनाच्या नादात शेकडो पर्यटक आदेशांकडे दुर्लक्ष करत आहेत.
खारघर सेक्टर-५ सरस्वती अभियांत्रिकी महाविद्यालयलगत असलेल्या धबधब्यावर पोलिसांकडून कोणतेही फलक लावण्यात आलेले नाही. तसेच पोलिस बंदोबस्त नसल्यामुळे पर्यटकांसाठी हा धबधबा आकर्षण ठरत आहे. सुट्टीचा दिवस असल्याने लहान लहान ओढ्यातून मुले, महिला पाण्याच्या धारेत भिजण्याचा आनंद घेताना दिसून आले, तर मद्यधुंद अवस्थेतील तरुण फिरत असल्याने वादावादीचे प्रसंग उद्भवण्याची भीती स्थानिकांकडून व्यक्त केली जात आहे.
--------------------------------------
मद्यपींमुळे वादावादीचे प्रसंग
खारघर सेक्टर-५ परिसर डोंगराला लागून आहे. डोंगरातून वाहणारे धबधबे आणि वाढलेल्या गर्द झाडीमुळे मद्यपी मद्यप्राशन करून पावसात भिजून पावसाचा आनंद घेत असतात. गर्द झाडीत तसेच मोकळ्या जागेत मद्यप्राशन करताना दिसतात. याविषयी काही पर्यटकांकडे विचारणा केली असता पांडवकडा परिसरात पोलिसांचा बंदोबस्त असतो, पण परिसर वसाहतीला लागून आहे. त्यामुळे पोलिस फिरकत नसल्याने पर्यटकांची हुल्लडबाजी सुरू असते.
-------------------------------------
पर्यटक अडकण्याचे प्रकार
खारघर सेक्टर-५ लगत पावसाचा आनंद घेताना पावसामुळे मोठ्या प्रमाणात पर्यटक अडकून पडले होते. त्या वेळी पोलिस, अग्निशमन दलाच्या जवानांनी ७८ महिला पाच मुले अशा ८३ पर्यटकांची सुखरूप सुटका केली होती.