गद्दारांच्या विळख्यातील अंधकारमय लोकशाहीला

गद्दारांच्या विळख्यातील लोकशाहीला उद्धव ठाकरे यांची गरज
शिवसेना उपनेते बंड्या साळवी यांच्या काव्यमय शैलीत शुभेच्छा
सकाळ वृत्तसेवा
डोंबिवली, ता. २७ ः शिवसेना ठाकरे गटाचे पक्षप्रमुख उद्धव ठाकरे यांच्या वाढदिवसानिमित्त कल्याणमधील शिवसेनेचे उपनेते विजय उर्फ बंड्या साळवी यांनी कलाकृती असलेले स्मृतिचिन्ह तयार करून घेतले आहे. या स्मृतिचिन्हाद्वारे साळवी यांनी काव्यमय शैलीत पक्षप्रमुख ठाकरे यांना वाढदिवसाच्या शुभेच्छा दिल्या आहेत. यावर गद्दारांच्या राजकारणावर, त्यात अडकलेल्या लोकशाहीवर काव्यमय शैलीत टीका केली गेली आहे. या शुभेच्छा आता सामाजिक माध्यमांवर चर्चेचा विषय ठरत आहे.
काव्यमय मांडणीत साळवी म्हणाले, आज सारेच उफराटे झाले आहे. गद्दारांच्या राजकारणाने महाराष्ट्र खिळखिळा झाला आहे. हाताबाहेर गेलेल्या परिस्थितीकडे सामान्य जनता आत्मविश्वास गमावलेल्या नजरेने हताशपणे पाहात आहे. न्याय, अन्यायाचा हिशोबच कळत नाही. गद्दारांच्या विळख्यात लोकशाही अडकली आहे, महाराष्ट्र अंधारात चाचपडत आहे. अशा या अंधकारमय परिस्थितीतून बाहेर काढण्यासाठी पक्षप्रमुख उद्धव ठाकरे यांच्या तेजस्वितेची गरज आहे. उद्धव ठाकरे यांची तेजस्विता भगव्या तेजाने या देशावर झळाळू दे, अशी मागणी त्यांनी केली आहे.