सर्वोत्तम राष्ट्रीय पुरस्काराची डेहराडून महापलिकेकडून दखल !

मिरा-भाईंदरचा देशभर डंका
स्वच्छतेची डेहराडून पालिकेच्या शिष्टमंडळाकडून पाहणी
भाईंदर, ता. २७ (बातमीदार) : मिरा-भाईंदर शहराने नुकताच राष्ट्रीय पातळीवर स्वच्छतेचा पहिला क्रमांक पटकावला आहे. महापालिकेच्या या कार्याची दखल आता डेहराडून महापालिकेकडून घेतली आहे. मिरा-भाईंदरमधील शहर स्वच्छतेचे कार्य कशा पद्धतीने चालते याची डेहराडून महापालिकेच्या महापौर व आयुक्तांनी नुकतीच पाहणी केली.
मिरा-भाईंदर महापालिकेने तीन ते १० लाख लोकसंख्या गटात देशातील तब्बल चार हजार ५८९ शहरांमध्ये अव्वल ठरत प्रथम क्रमांकाचा राष्ट्रीय पुरस्कार नुकताच पटकावला. महापालिकेची ही कामगिरी नागरिकांसाठी अभिमानाची ठरत असतानाच देशातील अन्य महापालिकांकडून त्याची दखल घेतली आहे. मिरा-भाईंदर शहरातील दैनंदिन स्वच्छतेचे काम कशा रीतीने चालते याचा आढावा घेण्यासाठी डेहराडून महापालिकेचे महापौर सौरभ थपलियाल, आयुक्त नमामी बन्सल, मुख्य स्वच्छता निरीक्षक राजेश बहुगुणा व पुष्पा रोथॉन यांच्या शिष्टमंडळाने नुकतीच मिरा-भाईंदर महापालिकेला भेट दिली. शहरातील विविध स्वच्छता प्रकल्प, आधुनिक कचरा व्यवस्थापन तंत्रज्ञानासह शहरात राबवले जाणारे स्वच्छतेचे नावीन्यपूर्ण उपक्रम याविषयी या शिष्टमंडळाने माहिती घेतली. घनकचरा व्यवस्थापन विभागाचे उपायुक्त डॉ. सचिन बांगर यांनी डिजिटल तंत्रज्ञानाद्वारे कचरा संकलन, व्यवस्थापन व पुनर्प्रक्रिया याविषयी सविस्तर माहिती दिली.
अतिरिक्त आयुक्त डॉ. संभाजी पानपट्टे, अतिरिक्त आयुक्त श्रीमती प्रियंका राजपूत, उपायुक्त डॉ. सचिन बांगर, उपायुक्त कविता बोरकर, शहर अभियंता दीपक खांबीत, सहाय्यक आयुक्त योगेश गुणीजन, स्वच्छता निरीक्षक आदी या वेळी उपस्थित होते. अभिनव उपक्रमांद्वारे शहर स्वच्छ ठेवत मिरा-भाईंदर हे इतर शहरांसाठी आदर्श ठरेल. त्याचप्रमाणे राष्ट्रीय स्तरावर घेतलेली नोंद यापुढे आंतरराष्ट्रीय स्तरावर जावी यासाठी महापालिका प्रयत्नशील राहील, अशी प्रतिक्रिया आयुक्त राधाबिनोद शर्मा यांनी या वेळी व्यक्त केली.

नावीन्यपूर्ण उपक्रमांची माहिती
शहरातील आरआरआर केंद्र, नारळाच्या कचऱ्यापासून तयार होणारे कोकोपीट, देशातील पहिला स्वदेशी नियंत्रित विंड्रो कंपोष्टिंग प्रकल्प, प्लाझ्मा प्रकल्प व बायोगॅस प्रकल्प याची प्रात्यक्षिकासह माहिती, त्याचप्रमाणे शाळा, हॉटेल्स, महाविद्यालये व सोसायट्यांमध्ये स्वच्छतेबाबत जनजागृती करण्यासाठी राबविण्यात येणाऱ्या स्टार रँकिंग स्पर्धा, स्वच्छता की पाठशाळा अशा नावीन्यपूर्ण उपक्रमांविषयीदेखील शिष्टमंडळाला माहिती दिली.

पहिल्या स्वदेशी नियंत्रित विंड्रो कंपोस्टिंग प्रकल्पाला भेट
या दरम्यान शिष्टमंडळाने महापालिकेच्या देशातील पहिल्या स्वदेशी नियंत्रित विंड्रो कंपोस्टिंग प्रकल्पाला भेट देऊन तेथील कामकाजाचा, स्वच्छतेचा तसेच जमा होणारा ओला कचरा व त्याचे कंपोस्ट खत बनण्याच्या प्रक्रियेचा आढावा घेतला.