पाताळगंगा नदीवर ड्रोनच्या घिरट्या

खालापूर, ता. २७ (बातमीदार) : डॉक्टरकडे जातो, असे सांगून घरातून निघालेला एक व्यक्ती दोन दिवसांपासून बेपत्ता आहे. डोलवलीलगतच्या ओढ्यात दुचाकी सापडली आहे, पण चालकाचा शोध लागला नसल्याने ड्रोनद्वारे शोधमोहीम सुरू आहे.
डोलवली येथे जाण्यासाठी २५ जुलै रोजी दुपारी एक वाजता जितेंद्र पालांडे घराबाहेर पडले होते. परंतु संध्याकाळी उशिरापर्यंत घरी परतले नसल्याने त्यांचे कुटुंब, ग्रामस्थांकडून शोध सुरू आहे. या मार्गावरील सीसीटीव्ही फुटेज तपासले असता जितेंद्र यांनी डोलवलीलगतचा पूल ओलांडला नसल्याचे आढळून आले. पण शनिवारी त्यांची दुचाकी ओढ्यात सापडली आहे. त्यामुळे खालापूर पोलिस, हेल्प फाउंडेशनच्या पथकाने शोधमोहीम राबवली. ग्रामस्थांनी ओढा परिसर तसेच पाताळगंगा नदीपात्रात ड्रोनच्या साह्यानेदेखील शोधमोहीम राबवली; परंतु जितेंद्र यांचा काही तपास लागला नव्हता.
-----------------------
संरक्षक कठडा नसल्याने धोका
गोडवली ते डोलवली मार्गात ओढ्यावरील पुलाला संरक्षक कटडे नाहीत. अनेकदा शासन दरबारी तक्रारी करण्यात आल्या आहेत. अशातच पावसाळ्यात ओढा दुथडी भरून वाहत असल्याने विद्यार्थी, ग्रामस्थांना जीव मुठीत धरून प्रवास करावा लागतो.