वाचन बुद्धीची मशागत करण्याचे काम करते

वाचन बुद्धीची मशागत करण्याचे काम करते
साहित्यिक प्रकाश पाटील

वसई, ता. २८ (बातमीदार) ः वाचन हे मेंदूला टॉनिक देते. बुद्धीची मशागत करण्याचे काम करते, असे प्रतिपादन साहित्यिक प्रकाश पाटील यांनी नालासोपारा येथे केले. वसई विरार पालिका प्रभाग समिती ड आचोळे, सार्वजनिक वाचनालय येथे वाचक मेळाव्याचे आयोजन केले होते. या वेळी ते बोलत होते.
या वेळी साहित्यिक प्रकाश पाटील, उपायुक्त प्रशांत जाधव, वाचनालयाचे अधीक्षक हरेश्वर तुंबडा, अधीक्षक विजय चव्हाण, लेखापाल भावेश पाटील, चेतन बोबलेकर, ग्रंथपाल अमित मोदी, सहाय्यक ग्रंथपाल अरुणा तुजारे, सहाय्यक ग्रंथपाल संदेश देशमुख, मनाली पाटील, नंदिनी नाईक आदी उपस्थित होते.
लेखक, कवी यांचे साहित्य तसेच उच्च शिक्षणाचा अभ्यास करण्यासाठी पुस्तके महापालिकेच्या आचोळे वाचनालयात उपलब्ध आहेत. अभ्यासिका आणि ग्रंथालय असल्याने येथे वाचकांची संख्या वाढल्याची माहिती येथील सहाय्यक ग्रंथपाल अरुणा तुजारे, सहाय्यक ग्रंथपाल संदेश देशमुख यांनी दिली. याप्रसंगी अभ्यासिकेत अभ्यास करून परीक्षेत उत्तीर्ण झालेल्या विद्यार्थ्यांचा मान्यवरांच्या हस्ते सत्कार करण्यात आला.

स्पर्धा परीक्षेसाठी वसईकरांनी तयारी करा ः उपायुक्त
स्पर्धा परीक्षेसाठी वसई विरार वाचनालयात पुस्तके उपलब्ध आहेत. अभ्यासिकादेखील सुविधा देत आहे. यामुळे विद्यार्थ्यांनी याचा लाभ घ्यावा. भविष्यात वसईतील विद्यार्थी हे अनेक विभागांत उच्च पदावर रुजू होतील आणि देशसेवा करतील. त्यामुळे स्पर्धा परीक्षेकडे वळा, असे आवाहन उपायुक्त प्रशांत जाधव यांनी केले.

‘सकाळ’चे कौतुक
मला वाचनाची सवय जडली. त्यामुळे वयाच्या ५८व्या वर्षी पदवी परीक्षा उत्तीर्ण झाले. आज माझे वय ६८ आहे. सकाळ समूहाने आयोजित केलेल्या एका कार्यक्रमात मी विजेती झाले, हे केवळ वाचनामुळे शक्य झाल्याचे उद्गार माजी नगरसेविका अश्विनी ढसाळे यांनी काढले.

फोटोओळ ः
वसई : साहित्यिक प्रकाश पाटील यांनी वाचनाबत मार्गदर्शन केले.