दिघा, तुर्भेकरांची पाण्याची चिंता मिटणारदिघा, तुर्भेकरांची पाण्याची चिंता मिटणार

दिघा, तुर्भेकरांची पाण्याची चिंता मिटणार
लवकरच मोरबे धरणाचे पाणी टाकीतून नागरिकांपर्यंत पोहोचणार
वाशी, ता. २८ (बातमीदार) : दीर्घकाळ पाण्याच्या समस्येला सामोरे जाणाऱ्या दिघा आणि तुर्भे परिसरातील नागरिकांची पाण्याची चिंता लवकरच मिटणार आहे. या भागातील दोन उच्चस्तरीय पाण्याच्या टाक्यांचे काम पूर्ण झाले आहे. टाक्‍यांचे उद्‌घाटन होताच प्रत्यक्ष जलपुरवठा सुरू होणार असून, त्यामुळे दिघा आणि तुर्भेकरांची पाणीटंचाईची समस्या कायमची दूर होण्याची चिन्हे आहेत.
दिघा परिसरातील नागरिकांना पाणीपुरवठा केवळ एमआयडीसीच्या बारवी धरणातून होतो, मात्र वेळोवेळी एमआयडीसीकडून शटडाऊन घेतले जाते किंवा जलवाहिन्या फुटतात, अशा वेळी स्थानिक रहिवाशांना पाण्यासाठी मोठी कसरत करावी लागते. नवी मुंबई महापालिकेकडे स्वत:चे मोरबे धरण असूनही त्या पाण्याचा लाभ दिघा परिसराला मिळत नव्हता, मात्र स्थानिक लोकप्रतिनिधींच्या सातत्यपूर्ण पाठपुराव्यामुळे अखेर मोरबे धरणापासून दिघापर्यंत जलवाहिनी टाकण्यात आली. दिघा येथील ओएसएन वन या हस्तांतरित भूखंडावर भूमिगत आणि उच्चस्तरीय पाण्याची टाकी उभारण्यात आली आहे. तसेच तुर्भे परिसरातदेखील नव्याने पाण्याची टाकी बांधण्यात आली आहे. या दोन्ही ठिकाणी काम पूर्ण झाले असून, जलपुरवठा सुरू होण्यासाठी केवळ उद्‌घाटनाची वाट पाहिली जात आहे.
................
पाण्याच्या टाकीच्या कामाची वैशिष्ट्ये
दोन स्वतंत्र टाक्या, भूमिगत आणि उंचावर उभारण्यात आल्या आहेत. तसेच साठवण क्षमतेचा मोठा विस्तार आहे. त्‍यामुळे पाण्याची नियमितता राखण्यासाठी महत्त्वाचे ठरणार आहे. त्‍यामुळे मोरबे धरणातील पाण्याचा लाभ आता खासकरून दिघा व तुर्भेवासीयांसाठी स्थायी जलपुरवठ्याच्या माध्यमातून होणार आहे.
.................
लवकरच उद्‌घाटनाचा मुहूर्त
महापालिकेकडून लवकरच काही मोठ्या प्रकल्पांचे उद्‌घाटन मुख्यमंत्री एकनाथ शिंदे यांच्या हस्ते करण्यात येणार आहे. या प्रकल्पांच्या उद्‌घाटन यादीत दिघा आणि तुर्भे येथील पाण्याच्या टाक्यांचाही समावेश आहे. त्यामुळे मुहूर्त मिळताच या टाक्यांमधून जलपुरवठा सुरू होणार आहे.
......................