कल्याण पूर्वेत ३०० हुन अधिक वृक्षांचे रोपण

कल्याण पूर्वेत ३०० हून अधिक वृक्षांचे रोपण
कल्याण, ता. २८ (बातमीदार) : समदर्शी फाउंडेशनच्या माध्यमातून कल्याण पूर्वेतील १०० फूट रस्ता परिसरात वृक्षारोपण मोहीम राबविण्यात आली होती. पर्यावरण रक्षण आणि भावी पिढ्यांच्या श्वासासाठी ही मोहीम राबवली असल्याचे सांगण्यात आले. असंख्य युवक, नागरिक आणि सामाजिक संस्थांनी एकत्र येत ३०० हून अधिक झाडे लावून ही मोहीम यशस्वी केली.
एक झाड, हजारो श्वास! या मंत्रासह समाजात हरित क्रांती निर्माण करण्यासाठी संस्थेमार्फत अशाप्रकारे उपक्रम राबविण्यात येतात. पर्यावरणाचा समतोल राखणे, प्रदूषण कमी करणे, पावसाचे प्रमाण, नैसर्गिक आपत्तीपासून संरक्षण तसेच आल्हाददायक वातावरण या मोहिमेतून निर्माण होते. अनेक सामाजिक संस्था, शाळा, महाविद्यालये आणि स्थानिक नागरिक या मोहिमेत सहभागी झाले आहेत. अजूनही नागरिकांनी या मोहिमेत मोठ्या संख्येने सहभागी होऊन वृक्षारोपण करावे आणि शहराला हरित आणि सुंदर बनवण्यासाठी योगदान द्यावे, असे आवाहन करण्यात येत आहे.