सांस्कृतिक गणेशोत्सव महामंडळाचा बक्षिस वितरण सोहळा संपन्न

सांस्कृतिक गणेशोत्सव महामंडळाचा बक्षीस वितरण सोहळा संपन्न
कल्याण, ता. २८ (बातमीदार) : सांस्कृतिक गणेश उत्सव महामंडळातर्फे मागील वर्षाच्या गणेशोत्सवात सर्वोत्कृष्ट देखावा आणि गणेशमूर्ती सजावट स्पर्धेतील विजेत्या मंडळांना बक्षिसे वितरण करण्यात आली. सांस्कृतिक गणेश उत्सव महामंडळ, कल्याणचे संस्थापक महेश गायकवाड, शिवसेनेचे आमदार विश्वनाथ भोईर आणि इतर मान्यवरांच्या हस्ते गणेश मंडळांना बक्षिसे देण्यात आली.
शहरातील जवळपास २०० मंडळांनी या स्पर्धेत भाग घेतला होता. सर्वोत्कृष्ट सजावटीमध्ये शिवगर्जना मित्रमंडळाने प्रथम क्रमांक पटकावला असून, महामंडळाच्या वतीने त्यांना २१ हजार रोख आणि पारितोषिक देऊन गौरविण्यात आले. नेतीवलीचा राजा म्हणून प्रसिद्ध असलेल्या जय गणेश मित्रमंडळाने द्वितीय क्रमांक तर श्री साईराम सोसायटी गणेश मंडळाने तृतीय क्रमांकाचे बक्षीस पटकावले.
सर्वोत्कृष्ट मूर्ती सजावटीसाठी विठ्ठलवाडीच्या पंचशील बाग मित्रमंडळाला प्रथम क्रमांकाचे पारितोषिक देण्यात आले. तर टायगर वाधवा ग्रुप उल्हासनगर आणि तामिळ मित्रमंडळाला द्वितीय व तृतीय क्रमांकाचे पारितोषिक देऊन त्यांचा गौरव करण्यात आला. या सोहळ्यात विविध क्षेत्रांत उल्लेखनीय कामगिरी करणाऱ्या मान्यवरांचाही विशेष सन्मान केला गेला. याप्रसंगी कोळसेवाडी पोलिस स्टेशन गुन्हे शाखेचे पोलिस निरीक्षक गणेश न्हयादे व कल्याण पश्चिमचे आमदार विश्वनाथ भोईर हेदेखील उपस्थित होते.