चक्कीनाका येथे जीवघेणा खड्डा बुजविण्यासाठी नागरिकांचा पुढाकार

चक्कीनाका येथे जीवघेणा खड्डा बुजविण्यासाठी नागरिकांचा पुढाकार
कल्याण, ता. २८ (बातमीदार) : चक्कीनाका येथील एका खासगी रुग्णालयासमोर काँक्रीट रस्त्याच्या शेवटच्या टोकावर मोठा सहा फूट लांबीचा खड्डा निर्माण झाला आहे. वारंवार तक्रारी करूनही कोणत्याही उपाययोजना होत नसल्याने शेवटी स्थानिक नागरिकांनीच स्वखर्चातून सिमेंट ओतून हा खड्डा भरण्याचा प्रयत्न केला. दरम्यान, सततच्या पावसाने हा खड्डा भरण्यास यश आले नाही.
मे महिन्यापासून सुरू असलेल्या सततच्या पावसामुळे यंदा शहरातील रस्त्यांची जुलै महिन्यातच वाताहत झाली आहे. डांबरी रस्ते जागोजागी उखडले असून, त्यात पावसाचे पाणी साचून लहान-मोठी डबकी तयार झाली आहेत. यामुळे वाहनांना खड्ड्यांच्या खोलीचा अंदाज न आल्याने अपघाताचा धोका आहे. परिणामी, वाहनचालक व प्रवासी दोघांनाही त्रासाला सामोरे जावे लागत आहे.
चक्कीनाका येथेही काहीशी अशीच परिस्थिती उद्‍भवल्याने स्थानिकांनी स्वतःच खड्डा भरण्याचा प्रयत्न केला. जवळपास खासगी रुग्णालय असून, या मार्गाहून दिवसभरात रुग्णवाहिका भरवेगाने धावत असतात. यामुळे प्रशासनाने गंभीर दखल घेण्याची मागणी वाहनचालकांकडून होऊ लागली आहे.