दारुमुक्त खारघरसाठी लवकरच निवडणूक

खारघर, ता. २९ (बातमीदार) : शहर दारूमुक्त व्हावे, यासाठी संघर्ष समितीने शासन दरबारी पत्रव्यवहार, मोर्चे, आंदोलने केली गेली आहेत, पण शहरातील काही भागांत मद्यविक्री होत असल्याने निवडणूक घेण्याची मागणी जिल्हाधिकाऱ्यांकडे केली आहे.
खारघर शहराच्या दारूमुक्तीसंदर्भात आमदार प्रशांत ठाकूर यांनी विधिमंडळात प्रश्न उपस्थित केले होते. शासन स्तरावर हा लढा सुरू असताना आता संघर्ष समिती आक्रमक झाली आहे. याच अनुषंगाने सोमवारी (ता. २८) संघर्ष समितीच्या पदाधिकाऱ्यांनी जिल्हाधिकाऱ्यांची भेट घेताना दारूबंदीसाठी निवडणूक घेण्याची मागणी केली. या बैठकीत निवडणूक प्रक्रिया सुरू करण्यासाठी पंचवीस टक्के महिलांची सही असलेल्या निवेदनाबाबत चर्चा झाली. तसेच निवेदन मिळाल्यानंतर परिसरातील महिला असल्याची पडताळणी करून पुढील प्रक्रिया राबवण्याचे संकेत दिले गेले.
----------------------------------
लवकरच बैठक
आमदार, विविध पक्षाचे कार्यकर्ते, संघर्ष समितीचे पदाधिकारी यांची बैठक होणार आहे. या बैठकीत दारूबंदीसंदर्भात विचारविनिमय केला जाणार असल्याचे संघर्ष समितीचे पदाधिकारी संजय जाधव यांनी सांगितले.
----------------------------------
‘या’ ठिकाणी मतदान
खारघरमधील सेक्टर-६, ७, १० आणि १२ मध्ये बार, वाइन शॉप असल्यामुळे प्रभाग क्रमांक ४, ५ आणि ५ या परिसरात निवडणूक प्रक्रिया राबवण्यात येणार असल्याचे समजते.