कल्याण-बदलापूर मार्गाची कचरा कुंडी

कल्याण-बदलापूर मार्गाची कचराकुंडी
मांसविक्रेते व कुजलेल्या भाज्यांमुळे पसरते दुर्गंधी, श्वास घ्यायलासुद्धा होतोय त्रास

अंबरनाथ, ता. २९ (वार्ताहर) ः कल्याण-बदलापूर मार्गाची कचराकुंडी झाली असून जागोजागी कचरा फेकला जात आहे. यामध्ये मोठ्या प्रमाणात भाजी व मांसविक्रेते खराब व सडक्या भाज्यांसह मासळी रस्त्यावरच फेकून देत आहेत. यामुळे महामार्गावर दुर्गंधी पसरत आहे. त्यामुले मार्गावरून जाणाऱ्या नागरिकांचा व वाहनचालकांचा श्वास गुदमरतो.

कल्याण-बदलापूर मार्गावर चिखलोली परिसरात अनेक सोसायटी निर्माण झाल्या. त्यामुळे या परिसरात अनेकांनी आपला धंदा सुरू केला असून छोटे-मोठे भाजीविक्रेते, हातगाड्यांवर भाजी, फळे, फुले आणि मांसविक्रेते येथे बसतात. यामुळे सर्वसामान्यांना रोजगार मिळाला तरी हे भाजीविक्रेते रोज संध्याकाळी उर्वरित खराब भाजीपाला, मांसाचा तसेच इतर कचरा मात्र मार्गालगत फेकून देतात. रोज रात्री उशिरा हा कचरा मार्गालगत फेकून देण्यात येतो. तसेच सतत पडणाऱ्या पावसामुळे याच ठिकाणी कचरा कुजत असून यातून मार्गावर दुर्गंधी पसरत आहे. यामुळे या परिसरात श्वास घेण्यासही त्रास होत असून अक्षरशः श्वास गुदमरत आहे.

कुजलेल्या कचऱ्यावर डासांची पैदास होत आहे. तसेच रोगराई पसरण्याची दाट शक्यता वर्तवली जाते. भाजीविक्रेते शिल्लक भाजी, कुजलेली अथवा सुकलेली भाजी व इतर कचरा मार्गालगत फेकून निघून जातात. तसेच महामार्गावर अनेक महिला नदीचे मासे घेऊन सकाळच्या सुमारास विकायला बसतात. या महिलादेखील कचरा येथेच फेकून निघून जातात. त्यामुळेही मोठ्या प्रमाणात दुर्गंधी पसरत आहे.

कचऱ्याची विल्हेवाट लावावी
कचऱ्यामुळे दुर्गंधी पसरत असल्याने श्वसनाच्या आजारांसोबतच इतर गंभीर आजार उद्भवल्यास याला जबाबदार कोण? तसेच फेकलेला कचरा श्वान व गुरे खात असून ते कचरा थेट रस्त्यावर ओढत आणतात. त्यामुळे मार्गावरही अनेकदा कचरा पसरत असल्याचे पाहायला मिळते. दरम्यान, मार्गालगत कोणताही कचरा न फेकता याची योग्यरीत्या विल्हेवाट लावावी, अशी मागणी नागरिक करीत आहेत.