प्रकल्पग्रस्त कृतीसमिती आक्रमक

तुर्भे, ता. २९ (बातमीदार) : ठाणे-बेलापूर महाराष्ट्र राज्य औद्योगिक विकास मंडळ प्रकल्पातील प्रकल्पग्रस्तांच्या प्रलंबित मागण्यांसाठी पुन्हा एकदा प्रकल्पग्रस्त शेतकरी कृती समितीने आक्रमक भूमिका घेतली आहे. याच अनुषंगाने प्रादेशिक कार्यालय महापे येथे शुक्रवारी (ता. १) धरणे आंदोलन करण्यात येणार असल्याचे कृती समितीचे अध्यक्ष मनोहर पाटील यांनी सांगितले.
सिडको आधी राज्य सरकारच्या औद्योगिक विकास मंडळाने ठाणे-बेलापूर औद्योगिक वसाहत उभारण्यासाठी ठाणे तालुक्यातील शेतकऱ्यांच्या शेतजमिनींचे संपादन केले आहे. त्यानुसार शासनाच्या निर्णयाप्रमाणे नवी मुंबईतील शेतकऱ्यांना संपादित जमिनीच्या १५ टक्क्यांप्रमाणे भूखंड मिळावा, प्रकल्पग्रस्त दरावर व्याज आकारणे रद्द करावे, लाभार्थी प्रकल्पग्रस्तांना दोन एफएसआय विनामूल्य देण्यात यावे, अडवली-भुतवली व इतर गावठाण व विस्तार योजना लागू करावी, या मागण्यांसाठी महापे येथील कार्यालयासमोर प्रकल्पग्रस्त शेतकरी कृती समिती, विविध सामाजिक संघटना आणि ग्रामस्थ धरणे आंदोलन करणार आहेत.