पनवेल बस आगारात पाच नवीन बसगाड्यांची भर

पनवेल बस आगारात पाच नवीन बसगाड्यांची भर
प्रवासी सेवेला मिळणार गती; स्थानिकांकडून स्वागत
पनवेल, ता. २९ (बातमीदार) ः पनवेल शहर आणि परिसरातील वाढत्या प्रवासी संख्येला उत्तर देण्यासाठी महाराष्ट्र राज्य मार्ग परिवहन महामंडळाच्या वतीने पनवेल एस. टी. आगारात पाच नवीन बसगाड्यांची भर घालण्यात आली आहे. या बसगाड्या आज सकाळी आगारात दाखल झाल्या असून लवकरच त्या विविध मार्गांवर प्रवासी सेवेत दाखल होणार आहेत.
या नव्या बसेस आरामदायी आसनव्यवस्था, सुरक्षित संरचना आणि वेळेवर सेवा देणाऱ्या प्रणालींनी सुसज्ज आहेत. पनवेल–मुंबई, पनवेल–ठाणे, पनवेल–अलिबाग तसेच ग्रामीण मार्गांवर या बसगाड्यांचा वापर करण्यात येणार असून यामुळे स्थानिक प्रवाशांना दिलासा मिळणार आहे. एस. टी. चे परिवहन अधिकारी अमित गिरमे यांनी सांगितले की, या नव्या बसगाड्यांमुळे प्रवाशांना अधिक सुरक्षित, वेळेवर व सुविधायुक्त सेवा मिळेल. विशेषतः गर्दीच्या वेळात प्रवास अधिक सुलभ होईल.
पनवेल बसस्थानकात आयोजित झालेल्या लोकार्पण सोहळ्यात पनवेल महापालिकेचे विरोधी पक्षनेते प्रितम जनार्दन म्हात्रे यांच्या हस्ते या बसगाड्यांचे स्वागत करण्यात आले. यावेळी नगरसेवक गणेश कडू, नगरसेविका प्रीती जॉर्ज, सारिका भगत, वाहतूक अधिकारी ज्ञानेश्वर म्हात्रे, पनवेल आगार व्यवस्थापक अश्विनी फाळके, संजय पाटील तसेच आगारातील अनेक कर्मचारी उपस्थित होते. लोकार्पण प्रसंगी प्रितम म्हात्रे म्हणाले, पनवेल आगारात दाखल झालेल्या या नव्या बसगाड्या सुरक्षित आणि आधुनिक प्रवासाची नवी दिशा देतील. आगाराच्या नव्या इमारतीच्या बांधकामात काही त्रुटी आल्यामुळे काम थांबले आहे, मात्र लवकरच त्यावर योग्य पाठपुरावा करून प्रवाशांना अधिक चांगल्या सुविधा देण्याचे आमचे प्रयत्न सुरू आहेत. स्थानिक नागरिक व प्रवाशांनी या उपक्रमाचे स्वागत करत एस. टी. च्या वाढत्या सुविधा आणि वाहनांच्या दर्जाबाबत समाधान व्यक्त केले. पनवेलसारख्या वाढत्या शहरात सार्वजनिक वाहतूक व्यवस्था अधिक सक्षम आणि प्रवासी हिताची करण्याच्या दिशेने हे एक सकारात्मक पाऊल असल्याचे मत अनेकांनी व्यक्त केले.