शेअर ट्रेडिंगमधील गुंतवणुकीत गंडा

शेअर ट्रेडिंगमधील गुंतवणुकीत गंडा
सायबर ठगांना बँक खाती पुरवणाऱ्या आरोपीस अटक
अंधेरी, ता. ३० (बातमीदार) ः शेअर ट्रेडिंगद्वारे चांगल्या परताव्याच्या प्रलोभनाने एका महिलेची सुमारे २७ लाखांची फसवणूक केल्याप्रकरणी २८ वर्षांच्या आरोपीस ठाण्यातून उत्तर प्रादेशिक विभागाच्या सायबर विभागाने अटक केली. विनायक प्रमोदकुमार बर्नवाल असे या आरोपीचे नाव असून, त्याला बोरिवलीतील स्‍थानिक न्यायालयाने पोलिस कोठडी सुनावली आहे. त्याच्यावर फसवणुकीसाठी सायबर ठगांना बँक खाती पुरवल्याचा आरोप आहे. त्याने दिलेल्या बँक खात्यात आतापर्यंत १०६ हून फसवणुकीच्या गुन्ह्यांतील रक्कम ट्रान्स्फर झाल्याचे तपासात उघडकीस आले आहे.
५८ वर्षांची तक्रारदार महिला दहिसर येथे राहते. काही महिन्यांपूर्वी तिला एका अज्ञात व्यक्तीने एक मेसेज पाठवला होता. त्यात शेअर ट्रेडिंगची जाहिरात होती. तिला एक लिंक पाठवून शेअरमध्ये गुंतवणूक करण्यास प्रवृत्त केले होते. त्यांच्या प्रलोभनाला बळी पडून तिने विविध शेअरमध्ये २७ लाख ४४ हजार २३६ रुपयांची गुंतवणूक केली होती, मात्र या गुंतवणुकीवर तिला कुठलाही परतावा देण्यात आला नाही, तिची गुंतवणूक केलेली रक्कम परत करण्यात आली नाही. फसवणुकीचा हा प्रकार उघडकीस येताच तिने उत्तर सायबर विभागात तक्रार केली होती. गुन्हा दाखल होताच पोलिसांनी तपास सुरू केला होता. ठाण्यातून विनायक बर्नवाल या तरुणाला संशयित आरोपी म्हणून ताब्यात घेतले होते. तो ठाण्यातील कशेळी, मैत्रीपार्कच्या स्वस्तिक रेसीडेन्सी अपार्टमेंटमध्ये राहात होता. त्याने या सायबर ठगांना बँक खाती पुरविली होती. याच बँक खात्यात फसवणुकीची रक्कम जमा होत होती. ती रक्कम नंतर तो संबंधित सायबर ठगांना पाठवत होता. त्यासाठी त्याला कमिशन मिळत होते. त्याच्या बँक खात्याची पडताळणी केल्यानंतर राज्यासह देशभरात संबंधित खात्यात १०६ हून अधिक गुन्ह्यांतील फसवणुकीची रक्कम ट्रान्स्फर झाल्याचे उघडकीस आले आहे.