समजिस्कर कुटुंबाला मिळाला न्याय

बदलापूर, ता. ३० (बातमीदार) : बदलापूर शहरातील सह्याद्री रुग्णालयात झालेल्या चुकीच्या उपचारामुळे तरुणाचा मृत्यू झाल्यानंतर, सुमारे वर्षभराच्या पाठपुराव्यानंतर अखेर या प्रकरणात निर्णायक कारवाई होणार आहे. महाराष्ट्र राज्य आरोग्य सेवा आयुक्तालयाने जिल्हा शल्यचिकित्सकांना सह्याद्री व धनलक्ष्मी या दोन्ही रुग्णालयांना तातडीने बंद करण्याचे तसेच संबंधित डॉक्टरांवर फौजदारी गुन्हा दाखल करण्याचे आदेश दिले आहेत.
२८ नोव्हेंबर २०२४ मध्ये प्रवीण समजिस्कर (वय ३२) या तरुणाला अपघातानंतर जबड्याला दुखापत झाली होती. त्यावर सह्याद्री रुग्णालयात किरकोळ शस्त्रक्रिया करण्यात येणार होती. मात्र, भूल दिल्यानंतर त्यांची प्रकृती खालावली आणि त्यातच त्यांचा मृत्यू झाला. कुटुंबीयांनी रुग्णालयाकडून झालेल्या उपचारातील निष्काळजीमुळे मृत्यू झाल्याचा आरोप केला होता. या घटनेनंतर समजिस्कर कुटुंबीयांनी रुग्णालयावर कारवाईची मागणी केली. मात्र, प्रशासनाकडून कुठलीही ठोस पावले उचलली गेली नाहीत. अखेर सामाजिक कार्यकर्ते अविनाश सोनवणे व संगीता चेंदवणकर यांच्या माध्यमातून या प्रकरणाची माहिती सार्वजनिक झाली आणि तांत्रिक व कायदेशीर त्रुटी उघडकीस आल्या.
संपूर्ण चौकशीदरम्यान समोर आले की, सह्याद्री रुग्णालयाचे प्रमुख डॉ. योगेश मिंडे यांच्याकडे फक्त बीएएमएस होमिओपॅथीची पदवी असूनही ते ॲलोपॅथी सुपर स्पेशालिटी हॉस्पिटल चालवत होते. तसेच बदलापूर गावातील धनलक्ष्मी रुग्णालय हे त्यांनी डॉ. विकास कांबळे यांच्या सहकार्यातून सुरू केले होते. दोन्ही रुग्णालयांना आवश्यक ती ॲलोपॅथी परवानगी किंवा वैद्यकीय सल्लागार समितीची मान्यता नसतानाही अनेक वर्षांपासून ही रुग्णालये सुरू होती.
सोनवणे आणि चेंदवणकर यांनी या अनियमिततेची तक्रार आरोग्य सेवा आयुक्तालयाकडे केली. माहिती अधिकारात मिळालेल्या दस्तावेजांनुसार, सह्याद्री रुग्णालयाचा वैध परवाना ३१ मार्चलाच संपुष्टात आला होता आणि त्यानंतर तो नूतनीकरणही करण्यात आले नव्हते. त्यानंतर आरोग्यसेवा आयुक्तालयाने जिल्हा शल्यचिकित्सक डॉ. कैलास पवार यांना पत्र देऊन सह्याद्री आणि धनलक्ष्मी रुग्णालयांचे परवाने त्वरित रद्द करण्याचे आणि या ठिकाणी रुग्णसेवा बंद करण्याचे आदेश दिले. तसेच डॉ. योगेश मिंडे व डॉ. विकास कांबळे यांच्यावर फौजदारी गुन्हे दाखल करण्याचेही निर्देश या पत्रात देण्यात आले. या आदेशाची प्रत सामाजिक कार्यकर्त्यांना मिळाल्यानंतर त्यांनी ही मोठी विजयाची भावना व्यक्त केली. वर्षभराच्या संघर्षानंतर अखेर न्याय मिळाल्याचा अनुभव आहे. हे रुग्णालय बंद झाले, तर भविष्यात अशा घटना टाळता येतील, अशी प्रतिक्रिया अविनाश सोनवणे यांनी दिली.

डॉक्टरांवर लवकर गुन्हे दाखल करा!
आदेश येताच समजिस्कर कुटुंबीयाने वर्ष लागला; पण न्याय मिळाल्याची भावना व्यक्त केली. मात्र, जिल्हा शल्यचिकित्सक डॉ. कैलास पवार यांनीही लवकरात लवकर या दोन्ही रुग्णालयांवर कारवाई करून हे रुग्णालय बंद करून संबंधित डॉक्टरांवर गुन्हे दाखल करण्याची मागणी केली आहे, अशी प्रतिक्रिया प्रवीण समजिस्कर यांची बहीण ज्योती यांनी दिली आहे.