रस्त्यांच्या दायित्व कालावधीची तपासणी होणार

भाईंदर, ता. ३० (बातमीदार) : मिरा-भाईंदर शहरात रस्त्यांना पडलेल्या खड्ड्यांच्या पार्श्वभूमीवर या रस्त्यांच्या बांधकामांसदर्भात कंत्राटदारांवर असलेल्या दायित्व कालावधीचा आढावा महापालिका आयुक्तांकडून घेतला जाणार आहे.

मिरा-भाईंदर शहरात रस्त्यांना मोठ्या प्रमाणात खड्डे पडले आहेत. यातील बहुतांश खड्डे मेट्रो मार्गाचे काम सुरू असलेल्या रस्त्यांवर तसेच राष्ट्रीय महामार्गावर आहेत. त्याचप्रमाणे काही प्रमाणात शहराच्या अंतर्गत भागात असलेल्या रस्त्यांनाही खड्डे पडल्याचे दिसून येत आहे. मेट्रो मार्गाचे काम सुरू असलेल्या रस्त्यांना पडलेले खड्डे बुजवण्याची जबाबदारी ‘एमएमआरडीए’वर व राष्ट्रीय महामार्गाला पडलेले खड्डे बुजविण्याची जबाबदारी राष्ट्रीय महामार्ग प्राधिकरणावर आहे. अंतर्गत रस्त्यांची जबाबदारी मात्र महापालिकेवरच आहे.

सध्या खड्डे तातडीने बुजवून नागरिकांना दिलासा देण्याला प्राथमिकता देण्यात आली आहे. त्यानंतर रस्त्यांच्या गुणवत्तेनुसार कंत्राटदारांचेही मूल्यमापन केले जाणार असल्याचे आयुक्तांनी स्पष्ट केले. मिरा-भाईंदर शहरात महापालिका व ‘एमएमआरडीए’ने बांधलेल्या सिमेंट काँक्रीटच्या रस्त्यांना खड्डे न पडल्याने ते सुस्थितीत आहेत, मात्र डांबरी रस्त्यांना मोठ्या प्रमाणात खड्डे पडले अहेत. शिवाय अनेक ठिकाणचे सिमेंट काँक्रीट रस्ते अद्याप अर्धवट स्थितीत आहेत. ते पूर्ण करण्यासाठी महापालिकेने ५०० कोटींचे कर्ज घेण्याचा निर्णय घेतला होता; मात्र दोन राष्ट्रीयाकृत बँकांनी महापालिकेला कर्ज देण्यास नकार दिला आहे. त्यामुळे सिमेंट काँक्रीट रस्त्यांची कामे मंदगतीने सुरू आहेत. यावर प्रतिक्रिया देताना आयुक्त राधाबिनोद यांनी सांगितले, की राज्य सरकारकडून कर्ज घेण्यास मान्यता मिळाली आहे आणि बँकेकडून कर्ज घेण्याची कार्यवाही सुरू आहे.

अंतर्गत रस्ते महापालिकेने कंत्राटदाराच्या माध्यमातून बांधले आहेत. रस्ते बांधण्याचे कंत्राट देतानाच रस्त्याचा दायित्व कालावधीदेखील निश्चित करण्यात आलेला असतो. या कालावधीत संबंधित रस्ता नादुरुस्त झाला अथवा त्यावर खड्डे पडले, तर ते दुरुस्त करण्याची जबाबदारी त्या कंत्राटदारावर देण्यात आलेली असते. त्यामुळे खड्डे पडलेले रस्ते कोणत्या कंत्राटदाराने बांधले आहेत व त्याचा दायित्व कालावधी किती आहे, याचा आढावा घेऊन त्यानुसार पुढील कार्यवाही केली जाणार आहे.
- राधाबिनोद शर्मा, आयुक्त, मिरा-भाईंदर महापालिका