राष्ट्रपतींचे पोलिस पदक

न्हावा-शेवा वरिष्ठ पोलिस निरीक्षकांना राष्ट्रपतींचे पोलिस पदक
उरण, ता. ३० (वार्ताहर) ः नवी मुंबई पोलिस आयुक्तालयाचे आस्थापनेवरील न्हावा शेवा पोलिस ठाणे येथे प्रभारी वरिष्ठ पोलिस निरीक्षक बी. टी. ओवे यांना गुणवत्तापूर्ण सेवेसाठी भारताच्या राष्ट्रपती द्रौपदी मुर्मू यांनी पोलिस पदक जाहीर केले. हे पदक राज्यपाल सी. पी. राधाकृष्णन यांच्या हस्ते ओवे यांना प्रदान करण्यात आले. मंगळवारी (ता.२९) राजभवन येथे हा कार्यक्रम पार पडला.
बी. टी. ओवे हे १९९६ रोजी महाराष्ट्र लोकसेवा आयोगामार्फत सरळ सेवेने पोलिस उपनिरीक्षक या पदावर भरती झाले. त्यांनी महाराष्ट्र पोलिस अकॅडमी, नाशिक येथे प्रशिक्षण पूर्ण केलेले आहे. त्यांनी मुंबई पोलिस आयुक्तालयातील देवनार पोलिस ठाणे, अमली पदार्थ विरोधी कक्ष-मुंबई, ट्रॉम्बे पोलिस ठाणे, विशेष सुरक्षा विभाग मुंबई, पोलिस प्रशिक्षण केंद्र-मरोळ, फोर्स वन-मुंबई येथे कार्यरत असताना गुंड, गुन्हेगार व अमली पदार्थ विक्री करणारे गुन्हेगार यांचा पर्दाफाश करून चांगली कामगिरी केली आहे. तसेच न्हावा-शेवा पोलिस ठाणे येथे प्रभारी म्हणून कर्तव्य करीत आहेत. ओवे यांनी महाराष्ट्र पोलिस दलामध्ये पोलिस अधिकारी म्हणून सचोटीने केलेल्या उल्लेखनीय कामगिरीकरिता त्यांना वरिष्ठांकडून उत्तेजनार्थ अनेक बक्षिसे मिळालेली आहेत. त्यामुळे आज त्यांना राष्ट्रपती पुरस्कार मिळाला आहे. यामुळे न्हावा-शेवा पोलिस ठाण्याकडील त्यांचे अधिपत्याखालील पोलिस अधिकारी व अंमलदार यांच्याकडून ओवे यांचे अभिनंदन करण्यात येत आहे.