विरार पश्चिमेतील पाणीपुरवठा सुरळीत होणार

विरार, ता. ३० (बातमीदार) : शहराच्या पश्चिम परिसरातील ग्लोबल सिटी रुस्तमजी, एचडीआयएल परिसरातील गृहनिर्माण संस्थांमधील रहिवाशी मागील अनेक वर्षांपासून पाण्यापासून वंचित होते. आमदार राजन नाईक यांचा प्रयत्नामुळे मागील आठ महिन्यांत जवळपास सर्वच इमारतींना नवीन नळजोडणी मिळाली आहे. परंतु दोन महिन्यांपासून कमी दाबाने पाणीपुरवठा होत असल्यामुळे रहिवाशांना टँकरचा आधार घ्यावा लागतो. त्यामुळे अनेक इमारतींतील रहिवाशांनी आमदार नाईक यांच्याकडे तक्रार केली होती. या प्रकरणी दखल घेत त्याठिकाणी भेट दिली.

या परिसरामध्ये पाणीपुरवठा करण्यासाठी फेडरेशनच्या माध्यमातून खासगी वॉलमेनची नियुक्ती करण्यात आली आहेत. या वॉलमेनकडून फक्त ५० टक्केच वॉल खोलली जात असल्यामुळे भरपूर पाणी असूनसुद्धा कमी दाबाने पाणीपुरवठा होतो, असे निदर्शनात आले. नाईक यांनी महापालिकेच्या अधिकाऱ्यांशी संपर्क साधून फेडरेशनकडून हे अधिकार काढून घ्यावेत आणि महापालिकेतर्फे वॉलमेनची नियुक्ती करून पाणीपुरवठा करण्यात यावा, अशा सूचना दिल्या. या पाहणीदरम्यान बोळिंज पोलिस ठाण्याचे निरीक्षक प्रकाश कवळे, भाजप विरार पश्चिम मंडळ अध्यक्ष विशाल राऊत, सानवी येदे, ममता म्हात्रे, विश्वास राव, संजोग येदे, हरीश भगत, जितेश नाईक आदी उपस्थित होते.