भाविकांना एसटी महामंडळ घडवणार अष्टविनायक

श्रावणात भाविकांना एसटी महामंडळाकडून अष्टविनायकचे दर्शन
विशेष फेरीत महिला, ज्येष्ठ नागरिकांना मोफत प्रवासाची सुविधा
मनोर, ता. ३० ः श्रावण महिन्यात पालघर जिल्ह्यातील भाविकांना अष्टविनायक दर्शनासह नाशिक जिल्ह्यातील देवस्थानांचे दर्शन घडवण्यासाठी राज्य परिवहन मंडळाने पुढाकार घेतला आहे. अष्टविनायक आणि नाशिक दर्शनासाठी एसटीच्या विशेष फेऱ्या घोषित केल्या आहेत. अष्टविनायक दर्शन फेरीसाठी प्रत्येक शनिवारी आणि महिन्याच्या प्रत्येक संकष्टी चतुर्थीला यासोबत नाशिक दर्शनासाठी प्रत्येक शनिवारी विशेष बस सोडली जाणार आहे.
अष्टविनायक व नाशिक दर्शनासाठी पालघर आगारातून दोन, तर नालासोपारा आगारातून एक फेरी जाहीर करण्यात आली आहे. अष्टविनायक दर्शन फेरीत एक हजार २५७ रुपयांमध्ये भाविकांना येथील अष्टविनायक मंदिरांचे दर्शन घडवले जाणार आहे, तर नाशिक दर्शन फेरीत एक हजार १६७ रुपयांमध्ये भाविकांना त्र्यंबकेश्वर, वणी, सप्तशृंगी गड, रेणुकामाता मंदिर आणि शिर्डीच्या साई बाबांचे दर्शन घडवले जाणार आहे. यासाठी ऑनलाइन बुकिंगची सुविधा उपलब्ध केली असून, किमान ३५ प्रवाशांची बुकिंग झाल्यानंतर चालकाच्या नेतृत्वात, तर वीस प्रवाशांची बुकिंग असल्यास चालक आणि वाहकांच्या नेतृत्वात विशेष फेरीसाठी बस रवाना केली जाणार आहे. विशेष फेरीत महिला आणि ६५ वयाच्या प्रवाशांना पन्नास टक्के व ७५ वर्षे वय असलेल्या प्रवाशांना मोफत प्रवासाची सुविधा दिली जाणार आहे.

समूहाने बुकिंग करून व्रतवैकल्यांच्या श्रावण महिन्यात भाविक देवदर्शनाला जात असतात. देवदर्शनासाठी एसटी महामंडळाकडून विशेष देवदर्शन बस फेऱ्या घोषित केल्या आहेत. भाविकांनी देवदर्शन बस सेवेचा लाभ घ्यावा.
- कैलास पाटील, विभाग नियंत्रक कैलास पाटील, पालघर