पुराच्या पाण्यात साईडपट्टी खचली.अपघाताची शक्यता

पुराच्या पाण्यात साइडपट्टी खचली
अपघाताची शक्यता
रोहा, ता. ३० (बातमीदार) ः मागील आठवड्यात तालुक्याला मुसळधार पावसाने झोडपून काढले होते. या पुराचा रोहे शहर व ग्रामीण भागातील रस्त्यांना मोठा फटका बसला असून, पुरामुळे रस्त्यावरील साइडपट्टी वाहून गेल्याची घटना धानकान्हे ते देवकान्हे रस्त्यावर घडली आहे.
खांब-पालदाड रस्त्यांतर्गत धानकान्हे ते देवकान्हे हा मार्ग आधीच अर्धवट साइडपट्टी व तेथे पुरेसा भराव नसल्याने सर्वांच्या चर्चेचा विषय बनला आहे. अशातच येथून प्रवास करताना वाहनचालकाला पुरेशी खबरदारी घेऊनच प्रवास करावा लागत आहे. अरुंद रस्ता, साइडपट्टीचा अभाव, मोठ्या प्रमाणात वाढलेली झाडी झुडपे यामुळे या रस्त्यावर आतापर्यंत अनेक छोट्या-मोठ्या अपघातांच्या घटना घडल्या आहेत, तर मुसळधार पावसाने सर्वच क्षेत्राची मोठी हानी झाली असतानाच धानकान्हे ते देवकान्हे या रस्त्याची साइडपट्टी पाण्यामुळे वाहून गेली आहे, तर वाहून गेलेल्या साइडपट्टीवर वेळीच योग्य उपाययोजना न केल्यास सर्वच्या सर्व रस्ता वाहून जाण्याची भीती व्यक्त केली आहे.
या मार्गावर रात्रंदिवस सुरू असलेली वाहतूक व रहदारीचा विचार करता संबंधित प्रशासनाने लवकरात लवकर योग्य ती कारवाई करण्याची मागणीही आता जोर धरू लागली आहे, तर योग्य उपाययोजना न केल्यास रस्ताच बंद झाला, तर कामगार, विद्यार्थी, छोटे-मोठे व्यावसायिकांनाही याचा फटका बसण्याची शक्यता नाकारता येत नाही.