खारघर सेक्टर 12 मधील नाला बंदिस्त करून पे अँड पार्किंग वाहनतळ उभारण्याची मागणी

नाला बंदिस्त करून ‘पे अँड पार्किंग’ वाहनतळ उभारण्याची मागणी
खारघर, ता. ३० (बातमीदार) : खारघर वसाहतीतील वाढती लोकसंख्या आणि वाहनांची संख्या लक्षात घेता, सार्वजनिक रस्त्यांवरील पार्किंगमुळे प्रचंड वाहतूक कोंडी होत आहे. याच पार्श्वभूमीवर खारघर सेक्टर-१२ मधील नाला बंदिस्त करून त्या जागेवर ‘पे अँड पार्किंग’ वाहनतळ उभारण्याची मागणी नागरिकांकडून होत आहे. ही मागणी ‘खारघरचा राजा चॅरिटेबल ट्रस्ट’चे अध्यक्ष विजय पाटील यांनी पनवेल महापालिका आयुक्त गणेश देशमुख आणि आमदार प्रशांत ठाकूर यांच्याकडे पत्राद्वारे केली आहे.
सिडकोने बीयूडीपी गृहयोजनेतून या परिसरात सुमारे पाच हजारांहून अधिक गरीब व मध्यमवर्गीय घरकुलांची उभारणी केली आहे, मात्र निवासी इमारतींकडे पार्किंगची स्वतंत्र व्यवस्था नसल्याने नागरिकांना आपल्या दुचाकी आणि चारचाकी रस्त्यावर उभ्या कराव्या लागतात. परिणामी वाहतूक कोंडी नित्याची झाली आहे. सेक्टर-१२ मधून खारघर डोंगरातील पावसाचे पाणी वाहून नेणारा मोठा नाला खाडीत मिळतो. हा नाला अंदाजे एक किलोमीटर लांब व पुरेशा रुंदीसह आहे. याच नाल्यावर छप्पर घालून व मजबूत बंदिस्त करून त्यावर वाहनतळ बनवल्यास, वाहनांसाठी पुरेशी जागा उपलब्ध होईल आणि वाहतूक समस्याही सुटेल, असे मत स्थानिकांनी व्यक्त केले आहे. महापालिकेने भविष्यातील वाहनवाढ आणि वाहतूक समस्यांचा विचार करून हा पर्याय गांभीर्याने विचारात घ्यावा, अशी मागणी जोर धरत आहे.
..................
‘आयुष्मान भारत’, ‘आभा कार्ड’ नोंदणीसाठी विशेष मेळावे
खारघर, ता. ३० (बातमीदार) : पनवेल महापालिकेच्या खारघर क्षेत्रात ‘आयुष्मान भारत – प्रधानमंत्री जन आरोग्य योजना’ आणि ‘महात्मा जोतिबा फुले जन आरोग्य योजना’ या आरोग्यविषयक योजनांच्या नोंदणीसाठी विशेष मेळाव्यांचे आयोजन करण्यात आले. या वेळी उपयुक्त मार्गदर्शन महापालिकेचे अतिरिक्त आयुक्त मंगेश चितळे यांच्या नेतृत्वाखाली झाले. या उपक्रमाच्या यशस्वी अंमलबजावणीसाठी उपायुक्त प्रसेनजित कारलेकर आणि वैद्यकीय अधिकारी डॉ. आनंद गोसावी यांच्या मार्गदर्शनाखाली विशेष मोहिमा राबवल्या जात आहेत. खारघर सेक्टर -१२ व १५ मधील नागरी आरोग्य केंद्रांमधून या योजनांची माहिती देऊन लोकांची नोंदणी सुरू आहे. विशेष म्हणजे, या योजनेद्वारे पात्र नागरिकांना पाच लाख रुपयांपर्यंत आरोग्य विमा संरक्षण मिळणार असून, जवळपास ९७१ प्रकारच्या शस्त्रक्रिया व उपचार यामध्ये मोफत मिळणार आहेत. नोंदणी वाढवण्यासाठी आशा सेविका घरोघरी जाऊन जनजागृती करत आहेत. तसेच प्रत्येक आरोग्य केंद्रात वेगवेगळ्या दिवशी मेळावे आयोजित करण्यात आले आहेत. या मोहिमांची माहिती महापालिकेच्या सोशल मीडिया पेजवरही दिली जात आहे. यामुळे अधिकाधिक नागरिकांनी या योजनांचा लाभ घ्यावा, असे आवाहन करण्यात आले आहे.