माजी नगरसेवकांवर पालिकेची मदार

माजी नगरसेवकांवर पालिकेची मदार
शिंदेंच्या शिवसेनेत आतापर्यंत १२३ जण दाखल
सकाळ वृत्तसेवा
मुंबई, ता. ३० : मुंबई महापालिका जिंकण्यासाठी माजी नगरसेवकांना आपल्‍याकडे खेचण्यासाठी सर्वच राजकीय पक्ष्यांचे प्रयत्‍न सुरू आहेत. यामध्ये एकनाथ शिंदेंची शिवसेना आघाडीवर असून, आतापर्यंत एकूण १२३ माजी नगरसेवकांनी शिवसेनेत प्रवेश केल्याचे समोर आले आहे. यामध्ये शिवसेना ठाकरे गटाचे सर्वाधिक ७६ नगरसेवक आहेत.
उपमुख्यमंत्री एकनाथ शिंदे यांनी महापालिकेत बहुमत गाठण्यासाठी जोरदार ‘पक्षप्रवेश मोहीम’ उभी केली आहे. ठाकरेंच्या शिवसेनेव्यतिरिक्त काँग्रेसचे २६, राष्ट्रवादी काँग्रेसचे सात, मनसेचे सात, समाजवादी पक्षाचे दोन, एमआयएमचे दोन, अखिल भारतीय सेनेचा एक आणि अपक्ष दोन माजी नगरसेवकांनी शिवसेनेचा झेंडा हाती घेतला आहे.
२०१७-२०२२ या कार्यकाळातील सर्वाधिक म्हणजे ५९ नगरसेवकांनी प्रवेश केला असून, त्यामध्ये ठाकरे गटाचे ४४ जण आहेत. याखालोखाल २०१२-२०१७ मधील ३३ नगरसेवक, तर २००२ पूर्वीच्या काळातील १२ नगरसेवकांनी शिवसेनेत प्रवेश केला आहे. विभागनिहाय पाहता पश्चिम उपनगर व पूर्व उपनगर या दोन्ही भागांत प्रत्येकी ४३ नगरसेवकांनी प्रवेश केला असून, मुंबई शहरातूनही ३७ नगरसेवकांनी शिवसेनेत उडी घेतली आहे.

सध्याचे राजकीय बलाबल
- फुटीआधी २०१७ च्या पालिका निवडणुकीत शिवसेनेचे ८४ नगरसेवक निवडून आले. निकालानंतर चार अपक्ष नगरसेवकांनी शिवसेनेत प्रवेश केला. त्यामुळे एकूण नगरसेवकांची संख्या ८८ झाली.
- पुढे मनसेच्या सहा नगरसेवकांनी शिवसेनेत प्रवेश केला. त्यानंतर शिवसेनेकडील नगरसेवकांचे संख्याबळ ९४ झाले. २०२२ पर्यंत शिवसेनेचे आणखी पाच नगरसेवक वाढले. त्यामुळे शिवसेनेकडे एकूण ९९ नगरसेवक होते.
- मुंबई महापालिकेत नऊ प्रभाग वाढवण्यात आले असून, आता नगरसेवकांची संख्या २२७ ऐवजी २३६ इतकी होण्याची शक्यता आहे. त्यामुळे बहुमतासाठी ११९ आकडा गाठावा लागेल.
- २०१७ च्या निवडणुकीत मुंबई महापालिकेत शिवसेनेचे (अखंड शिवसेना) सर्वाधिक ८४ नगरसेवक निवडून आले होते. त्याखालोखाल भाजपचे ८२ नगरसेवक जिंकले होते.

आपली ताकद केवळ ठाण्यात नाही, तर मुंबईतही असल्‍याचे एकनाथ शिंदे यांना दाखवून द्यायचे आहे. त्‍यामुळे ते अधिकाधिक नगरसेवकांना आपल्याकडे खेचण्याचा प्रयत्न करत आहेत. आमचीच खरी शिवसेना असल्‍याचेदेखील त्‍यांना दाखवून द्यायचे आहे. माजी नगरसेवकांचे संख्याबळ वाढवून भाजपकडून अधिकाधिक जागा घ्‍यायच्या आहेत.
- हेमंत देसाई, राजकीय विश्लेषक