किटकजन्य आजारांचा धोका वाढला

भिवंडी, ता. ३० (वार्ताहर) : पावसाळ्याच्या पार्श्वभूमीवर डेंगी, मलेरिया आणि चिकनगुनिया यांसारख्या किटकजन्य आजारांचा फैलाव होण्याचा धोका वाढला आहे. या पार्श्वभूमीवर भिवंडी महापालिकेने प्रतिबंधात्मक उपाययोजना सुरू केल्या आहेत. आयुक्त अनमोल सागर यांच्या निर्देशानुसार महापालिकेच्या वैद्यकीय विभागामार्फत विविध प्रभागांमध्ये धूरफवारणी, तेलफवारणी आणि आरोग्य जनजागृती अभियान हाती घेण्यात आले आहे.
महापालिकेच्या मलेरिया वर्करमार्फत विविध सोसायट्यांमध्ये जाऊन रहिवाशांना मलेरिया, डेंगी आणि चिकनगुनिया या आजारांविषयी माहिती देणारी पत्रके वितरित केली जात आहेत. तसेच या आजारांपासून संरक्षणासाठी कोणत्या उपाययोजना आवश्यक आहेत, याचे मार्गदर्शनही करण्यात येत आहे. ताप आल्यास नागरिकांनी त्वरित जवळच्या नागरी आरोग्य केंद्रात जाऊन तपासणी व उपचार घेण्याचे आवाहन करण्यात आले आहे. पालिकेने डेंगी व मलेरिया रुग्ण आढळून आलेल्या भागांत नियमितपणे धूरफवारणी, तेलफवारणी आदी कीटकनाशक उपाययोजना सुरू केल्या आहेत. याशिवाय नागरिकांना साथरोग प्रतिबंधक आरोग्य शिक्षणही दिले जात आहे.

नागरिकांना काळजी घेण्याचे आवाहन
महापालिकेने शहरातील नागरिकांना घर आणि आजूबाजूच्या परिसरात स्वच्छता राखण्याचे आवाहन केले आहे. पाण्याच्या प्लॅस्टिक टाक्या, कूलर, फ्रीजच्या ट्रे, पक्ष्यांची पाणी पिण्याची भांडी, झाडांच्या कुंड्या, नारळाच्या करवंट्या, टायर इत्यादी ठिकाणी पाणी साचणार नाही, याची दक्षता घेण्याचे निर्देश देण्यात आले आहेत. आठवड्यातून एकदा टाक्या कोरड्या करून पाण्यावर झाकण अथवा कापड ठेवावे, अशी सूचना करण्यात आली आहे. महापालिकेच्या आरोग्य विभागाने नागरिकांनी सहकार्य करावे आणि दिलेल्या सूचनांचे काटेकोर पालन करून स्वतःच्या आरोग्याचे संरक्षण करावे, असे आवाहन केले आहे.

डेंगीबाधित रुग्णांची माहिती देण्याचे आदेश
कोणत्याही प्रकारचा ताप आल्यास त्वरीत जवळच्या नागरी आरोग्य केंद्रात जाऊन रक्त तपासणी करून घ्यावी. हिवताप जंतुबाधित डास चावल्यानंतर कोणालाही हिवतापाची लागण होऊ शकते. मलेरिया किंवा डेंगीचे निदान लवकर झाले, तर त्यावर प्रभावी उपचार शक्य होतो, असे वैद्यकीय विभागाने सांगितले आहे. याशिवाय खासगी रुग्णालये व प्रयोगशाळांना डेंगीबाधित रुग्णांची माहिती तातडीने संबंधित आरोग्य केंद्रांना देण्याचे आदेशही महापालिकेने दिले आहेत. शहरातील नागरिकांनी मलेरिया, डेंगी व चिकनगुनियापासून बचाव करण्यासासाठी उपाययोजनांचा उपयोग करून पालिका प्रशासनाला सहकार्य करावे, असे आवाहन करण्यात आले आहे.