कशेणे गावात बिबट्याचा संचार

माणगाव, ता.३०(बातमीदार)ः मुंबई-गोवा महामार्गावरील कशेणे गावात बिबट्याचे दर्शन झाले आहे. गावातील एका घराच्या
पाठीमागे असलेल्या सीसीटिव्हीमध्ये हा प्रकार कैद झाल्याने ग्रामस्थांमध्ये भीतीचे वातावरण आहे.
माणगाव तालुक्यातील मौजे कशेणे गावात बिबट्याचा मुक्त संचार दोन दिवसांपूर्वी बिबट्या आला होता, याची चर्चा होती. परंतु, कोणाला खात्री नसल्याने अनेकांकडून ही अफवा असल्याची शक्यता वर्तवली जात होती. अशातच मंगळवारी (ता.२९) रात्री १२. ४० सुमारास कशेणे गावातील गणपत शिंदे यांच्या घराच्या पाठीमागे असलेल्या सीसीटीव्हीमध्ये बिबट्या संचार कैद झाला आहे. यामुळे गावात बिबट्याचा वावर असल्याने गावकऱ्यांमध्ये भीतीचे वातावरण आहे. तसेच गावातील तीन श्वानसुद्धा बिबट्याने गायब केल्याचा दावा ग्रामस्थांनी केला आहे.
------------------------------
वनविभाग सतर्क
कशेणे गावात बिबट्याचा संचार असल्याचे स्पष्ट झाले आहे. ग्रामस्थांची याबाबत बैठक घेण्यात आली असून रात्री-अपरात्री फिरू नये, मुलांना एकटे बाहेर सोडू नये तसेच आपतकालिन परिस्थितीत धैर्याने परिस्थितीला सामोरे जाण्यासाठी सूचना केल्या असल्याची माहिती वनविभागाचे अधिकारी प्रशांत शिंदे यांनी दिली.