संथ दुरुस्तीचे काम अपघातांना निमंत्रण;

धानिवरी पुलाची दुरुस्ती संथगतीने
अपघातांना निमंत्रण; वाहनचालक संतप्त
कासा, ता. ३० (बातमीदार) ः मुंबई-अहमदाबाद राष्ट्रीय महामार्गावरील धानिवरी पुलावर गेले अनेक महिने सुरू असलेले दुरुस्तीचे काम अत्यंत संथगतीने सुरू आहे. या अर्धवट कामामुळे वाहतूक कोंडी व अपघातांचे प्रमाण वाढले असून, वाहनचालकांमध्ये तीव्र नाराजी निर्माण झाली आहे.
धानिवरी गावाजवळील सुसरी नाल्यावर असलेला हा पूल जुना व जीर्ण झाला आहे. मागील वर्षी या पुलावर भगदाड पडल्याने दुरुस्तीचे काम हाती घेण्यात आले होते. त्या वेळेस वाहतूक एकेरी केली होती, मात्र त्याच मार्गावरून उलट दिशेने म्हणजेच गुजरातहून मुंबईकडे येणाऱ्या वाहनांचीही वाहतूक सुरू ठेवली. यामुळे दुर्घटनेचा धोका वाढला.
रस्त्याच्या मधोमध सिमेंटचे डिव्हायडर ठेवल्यामुळे ब्लिंकर्स, स्वयंसेवक किंवा स्पष्ट सूचना नसल्याने वाहनचालक गोंधळात पडतात. पावसाळ्यात दृश्यमानता कमी असल्यामुळे अपघाताचे प्रमाण अधिकच वाढत आहे.

पुलाची संरचना कमजोर
पुलाखालील पिलर आणि गंजलेले लोखंडी भाग यामुळे संपूर्ण संरचना कमजोर झाली असून, काही काळापूर्वी सिमेंट काँक्रीटने खालील बाजू डागडुजी करून पूल सुरू ठेवण्यात आला, मात्र काही महिन्यांतच पुन्हा भगदाड पडले आणि काम पुन्हा सुरू झाले.
तात्पुरते उपाय म्हणून गंजलेल्या लोखंडी सळ्या काढून वेल्डिंग करून काम चालू ठेवले जाते. मात्र हे उपाय अपुरे ठरत असून नूतनीकरण करणे आवश्यक आहे, अशी मागणी आता तीव्र झाली आहे.

वाहनचालक-मालक संघटनेचे प्रवक्ते हरबन सिंग नन्नाडे यांनी म्हटले, की अनेक वर्षांपासून या पुलावर खड्डे पडत आहेत. पुलाखालील भाग गंजला असून, आम्ही महामार्ग प्राधिकरणाला वेळोवेळी कळवले आहे, पण फक्त डागडुजी करून जबाबदारी झटकली जाते. मोठा अपघात झाल्यास जबाबदार कोण, असा सवाल करीत संताप व्यक्त केला आहे.

दुरुस्तीचे काम पुन्हा सुरू
या पार्श्वभूमीवर महामार्ग प्राधिकरणाचे प्रबंधक सुहास चिटणीस यांनी म्हटले, की पुलावरील दुरुस्तीचे काम पुन्हा सुरू आहे. ठेकेदारास अधिक दक्ष राहण्यास सांगितले आहे. सुरक्षेसंदर्भात सूचना फलक लावण्याचेही आदेश देण्यात आले आहेत, असी माहिती त्यांनी दिली.
या संतगतीच्या कामामुळे दररोज वाहतूक कोंडी होत असते. त्याचबरोबर अनेक वाहनांचे अपघात घडत आहेत. त्यामुळे महामार्गावर प्रवास करावा की नाही, असा प्रश्‍न पडत आहे. अनेक ठिकाणी महामार्गावर खड्डे पडले आहेत. त्यामुळे वाहनचालक त्रस्त आहेत.