घाटकोपरमध्ये गाळ्याला भीषण आग

घाटकोपरमध्ये गाळ्याला भीषण आग
घाटकोपर, ता. ३० (बातमीदार) ः घाटकोपर रेल्वेस्थानकलगतच्या श्रद्धानंद रोडवरील बीट पोलिस चौकीच्या बाजूच्या एका गाळ्याला आज (ता. ३०) दुपारी भीषण आग लागली. त्यात सुदैवाने कोणतीही जीवितहानी झाली नाही, मात्र दुकानातील साहित्य जळून खाक झाले. दरम्यान, ही आग शॉर्टसर्किटमुळे लागल्याची माहिती पोलिसांनी दिली आहे. या गाळ्याच्या बाजूला घाटकोपर पोलिस ठाण्याची बीट चौकी आहे. घटनेवेळी चौकीमध्ये पोलिस अधिकारी नानासाहेब डाके आणि शरद शेट्ये हे होते. आगीची माहिती मिळताच त्यांनी आजूबाजूच्या व्यापाऱ्यांना सोबत घेऊन पाण्याच्या सहाय्याने आग विझवण्याचा प्रयत्‍न केला. घटनास्‍थळी दाखल झालेल्‍या अग्‍निशमन दलाच्या जवानांनी आगीवर नियंत्रण मिळवले. दरम्यान, या आगीत कोणीही जखमी झाले नाही.