कल्याण पूर्वेत रस्त्यांना मलमपट्टी

कल्याण पूर्वेत रस्त्यांना मलमपट्टी
कल्याण, ता. ३१ (बातमीदार) : मागील अनेक दिवसांपासून सुरू असलेल्या पावसामुळे शहरातील डांबरी रस्त्यांची दुरवस्था झाली असून, ठिकठिकाणी खड्डे पडले आहेत. दरम्यान, बुधवारी (ता. ३०) पावसाने काही वेळ उघडीप घेतल्यानंतर अंतर्गत रस्त्यावर पडलेले खड्डे तात्पुरत्या स्वरूपात बुजविण्याचे काम हाती घेतले होते. पावसाने बऱ्यापैकी उघडीप घेतल्यानंतर ठोस उपाययोजना केल्या जाणार आहेत.

कल्याण पूर्वेत अनेक रस्त्यांची काँक्रीटीकरणाची कामे अपूर्णवस्थेत आहेत, तर सततच्या पावसामुळे डांबरी रस्ते उखडले गेले आहेत. मागील आठवड्यातच चिंचपाडा रस्त्याची दुरवस्था झाल्याने रिक्षाचालकांनी सकाळच्या वेळी अघोषित बंद पुकारला होता. यानंतर महापालिकेला निवेदन दिल्यानंतर रिक्षाचालकांनी बंद मागे घेतला होता. त्यानंतर आता काटेमानिवली येथे तात्पुरती मलमपट्टी करण्याचे काम हाती घेतले असून, वाहनचालकांना तात्पुरता दिलासा मिळाला आहे.

वाहनचालकांची नाराजी
काटेमानिवली ते चिंचपाड्याला जोडणारा सदर रस्ता खडेगोळवली व आमराईलाही जोडून असल्याने दिवसभरात असंख्य वाहनांची वर्दळ असते, शिवाय या मार्गावर महाविद्यालयदेखील असल्याने विद्यार्थ्यांनाही खड्ड्यांचा सामना करावा लागत आहे. दरवर्षी पावसाळ्यात खड्डेमय होणाऱ्या रस्त्याचा प्रश्न लवकरात लवकर कायमस्वरूपी सोडवावा, अशी मागणी येथील संतप्त नागरिक करीत आहेत. तात्पुरत्या स्वरूपात खड्डे बुजवले असले तरी पुढच्या काही दिवसांत परिस्थिती जैसे थेच होणार अशीही नाराजी वाहनचालकांकडून व्यक्त केली जात आहे.