डिजिटल स्किल लॅबचे उद्घाटन.

जिल्हा परिषद शाळेत डिजिटल स्किल लॅब
विक्रमगड, ता. ३१ (बातमीदार) ः तालुक्यातील जिल्हा परिषद शाळा टेटवाली येथे मिझुहो बँक सीएसआर आणि लार्सन अँड टूब्रो (एल अँड टी) पब्लिक चॅरिटेबल ट्रस्ट यांच्या संयुक्त विद्यमाने अत्याधुनिक डिजिटल कौशल्य प्रयोगशाळेचे उद्‍घाटन झाले. या प्रयोगशाळेचे उद्‍घाटन एल ॲण्ड टी पब्लिक चॅरिटेबल ट्रस्टच्या प्रमुख गायत्री ओलेटी यांच्या हस्ते झाले.
या प्रयोगशाळेच्या स्थापनेसाठी एल अँड टी ट्रस्टने वर्गखोलीचे पूर्ण नूतनीकरण केले असून, यामध्ये १५ संगणक, एक लॅपटॉप, एक प्रिंटर, फर्निचर आणि डेस्क यांचा समावेश आहे. ही प्रयोगशाळा सौरऊर्जेवर चालणारी असून, अखंडित वीज पुरवठ्यासाठी बॅटरी बॅकअपची व्यवस्थाही केली आहे. यामध्ये मिझुहो बँकेचे सीएसआर प्रमुख साची कौल आणि त्यांच्या सहकारी सुहान्या गिरी यांनी दृकश्राव्य प्रणालीद्वारे उपस्थिती नोंदवली. यावेळी ट्रस्टचे संदीप भट, आकांक्षीत तालुका कार्यक्रम समन्वयक शितल भांगरे, तालुका शिक्षण अधिकारी चेतन वाडीले, विस्तार अधिकारी प्रभू पाचमासे, सरपंच ज्योती माढा, उपसरपंच विजय काकड, ग्रामसेवक, विस्तार अधिकारी अमृता संखे, शाळेचे मुख्याध्यापक शांताराम थोडगा, प्रशांत नडगे आदींसह सर्व शिक्षक आणि शाळा व्यवस्थापन समितीचे सदस्य उपस्थित होते.
ही डिजिटल कौशल्य प्रयोगशाळा इयत्ता पहिली ते आठवीमधील सुमारे १५२ विद्यार्थ्यांना मूलभूत संगणक साक्षरता आणि डिजिटल तंत्रज्ञानाशी संबंधित कौशल्ये शिकण्यास मदत करेल. यामुळे विद्यार्थ्यांचा शैक्षणिक अनुभव अधिक समृद्ध होईल आणि त्यांना भविष्यातील संधींसाठी सक्षम बनवेल. एल अँड टी ट्रस्टचे कार्यक्रम समन्वयक अक्षय कातड आणि त्यांच्या सहकाऱ्यांनी या प्रकल्पाच्या यशस्वी अंमलबजावणीसाठी विशेष प्रयत्न केले आहेत.