महामार्गावरील अपघात टाळण्यासाठी सर्व यंत्रणांनी तातडीने उपाययोजना कराव्यात , जिल्हाधिकारी किशन जावळे

अपघात टाळण्यासाठी तातडीने उपाययोजना करा ः जिल्हाधिकारी
खोपोली, ता. ३१ (बातमीदार) ः रस्ते अपघात टाळण्यासाठी सर्व संबंधित यंत्रणासोबत सार्वजनिक बांधकाम विभाग, राष्ट्रीय महामार्ग आणि परिवहन विभाग यांनी तातडीने आवश्यक त्या सर्व उपाययोजना कराव्यात. यापुढे या मार्गांवर रस्ते दुरुस्तीअभावी अपघात घडल्यास संबंधित यंत्रणेवर जबाबदारी निश्चित करून सदोष मनुष्यवधाचा गुन्हा दाखल करण्यात येईल, असे निर्देश जावळे यांनी दिले.
जिल्हाधिकारी कार्यालयात आयोजित रस्ता सुरक्षा समितीच्या बैठकीत ते बोलत होते. या वेळी पोलिस अधीक्षक आंचल दलाल, निवासी उपजिल्हाधिकारी संदेश शिर्के, अधीक्षक अभियंता सुषमा गायकवाड, पोलिस उपायुक्त तिरुपती काकडे यांसह सर्व यंत्रणा उपस्थित होते.
बैठकीमध्ये रायगड ग्रामीण पोलिस तसेच नवी मुंबई पोलिस आयुक्तालयाच्या हद्दीत मागील वर्षभरात झालेल्या अपघातांचा आढावा घेतला. सार्वजनिक बांधकाम विभाग, एनएचएआय, एमएसआरडीसी, सार्वजनिक बांधकाम-राष्ट्रीय महामार्ग विभाग, पनवेल महानगरपालिका हद्दीतील धोकादायक अपघात ठिकाणांबाबतचा (ब्लॅक स्पॉट) आढावा घेऊन केलेल्या उपाययोजना व त्यानंतर अपघात प्रमाणात झालेली घट याबाबत चर्चा करण्यात आली.
जिल्ह्यात महामार्ग, राज्य मार्ग यांवरील ब्लॅक स्पॉट शोधून त्यावर उपाययोजना, दर्शक सूचनाफलक लावणे, वेगमर्यादा दर्शक फलक लावणे, महामार्गावर अनधिकृतरित्या डिव्हायडर तोडून ठेवले आहेत, ते पुन्हा स्थापित करून संबंधितांवर गुन्हे दाखल करणे आदी उपाययोजना राबवाव्या,असे निर्देश जिल्हाधिकाऱ्यांनी दिले, तर वाहतुकीला अडथळे आणणाऱ्या होर्डिंगला तातडीने हटविण्याचे निर्देश जावळे यांनी दिले. आगामी सण, उत्सवाच्या पार्श्वभूमीवर रस्त्यांच्या दुरुस्तीची कामे तातडीने पूर्ण करावीत, असेही त्यांनी म्हटले आहे.