शेताच्या बांधावर प्रशासकीय अधिकारी

शेताच्या बांधावर प्रशासकीय अधिकारी
जिल्हा परिषदेचा अभिनव उपक्रम; प्रत्यक्ष भात लागवडीतून मार्गदर्शन
मुरूड, ता. ३१ (बातमीदार) : शेतीत आधुनिकता आणत शेतकऱ्यांना नवतंत्रज्ञानाची ओळख करून देण्यासाठी रायगड जिल्हा परिषदेच्या अतिरिक्त मुख्य कार्यकारी अधिकारी सत्यजित बडे यांच्या संकल्पनेतून ‘शेताच्या बांधावर एक दिवस’ हा अभिनव उपक्रम राबविण्यात आला. यानुसार मुरूड तालुक्यातील चोरढे गावात प्रत्यक्ष शेतावर जाऊन यांत्रिकीकरणाद्वारे भातलागवडीचे प्रात्यक्षिक घेण्यात आले. विशेष म्‍हणजे या वेळी जिल्‍हा परिषदेच्या मुख्य कार्यकारी अधिकारी स्नेहा भोसले यांनी प्रत्यक्ष नांगरणी केली.
शेतीपासून दुरावलेला आजचा तरुण पुन्हा शेतीकडे वळावा आणि पारंपरिक शेतीला आधुनिकतेची जोड मिळावी, या हेतूने हा उपक्रम राबविण्यात आला. या वेळी उपस्थित मुख्य कार्यकारी अधिकारी स्नेहा भोसले यांनी शेतकऱ्यांना यांत्रिकीकरणाचे महत्त्व समजावले. मजुरांवरील अवलंबन कमी करून वेळ व पैशाची बचत करणारे यांत्रिक शेतीसाधन अधिकाधिक वापरण्याची गरज आहे, असे त्यांनी सांगितले. चोरढे गावातील शेतकरी फवाद हलडे यांच्या शेतावर यांत्रिकी भातलागवडीचे प्रात्यक्षिक घेण्यात आले. प्लॅस्टिक ट्रेतील रोपवाटिकेमुळे उत्तम दर्जाची रोपे तयार होतात आणि बियाण्यांवरील खर्चही अर्धा होतो. योग्य वेळी पेरणी होऊन अधिक फुटवे आणि चांगले उत्पन्न मिळण्यास मदत होते, असे कृषी अधिकारी राजेश घरत यांनी सांगितले.
.................
आधुनिक शेतीकडे लक्ष
या कार्यक्रमात प्रकल्प संचालक प्रियदर्शनी मोरे, मुख्य लेखा वित्त अधिकारी राहुल कदम, गटविकास अधिकारी राजेंद्र खताळ, कृषी विस्तार अधिकारी वसंत दळवी, युवा शेतकरी दिनेश मिणमिणे, रंजीत लवटे, प्रार्थना भोईर यांच्यासह जिल्हा परिषदेचे अधिकारी व शेतकरी मोठ्या संख्येने उपस्थित होते. या उपक्रमामुळे आधुनिक शेतीकडे शेतकऱ्यांचा कल वाढेल आणि जिल्हा परिषदेचे ‘शेतीला दिशा, शेतकऱ्याला नवी आशा’ हे ध्येय यशस्वीरित्या साध्य होईल, असा विश्वास या वेळी व्यक्त करण्यात आला.