फ्रेंडशिप डे निमित्त बाजारात भेटवस्तू खरेदीला उत्‍साह

फ्रेंडशिप डे निमित्त बाजारात भेटवस्तू खरेदीला उत्‍साह
नेरूळ, ता. ३१ (बातमीदार) ः ऑगस्ट महिना सुरू होताच ‘फ्रेंडशिप डे’ साजरा करण्याची लगबग सुरू होते. या दिवशी आपल्या प्रिय मित्र-मैत्रिणींप्रती प्रेम, स्नेह आणि आपुलकी व्यक्त करण्यासाठी अनेक तरुण खास तयारी करतात. यंदाचा फ्रेंडशिप डे ३ ऑगस्ट रोजी साजरा होणार असून, त्या पार्श्वभूमीवर नवी मुंबईच्या बाजारपेठांमध्ये उत्साहाचे वातावरण निर्माण झाले आहे.
मैत्री हे नाते प्रत्येकाच्या आयुष्यात अत्यंत महत्त्वाचे असते. या नात्याच्या साजरीकरणासाठी विशेष दिवस असलेला फ्रेंडशिप डे दरवर्षी उत्साहात साजरा होतो. याच दिवशी मित्रमैत्रिणींना फ्रेंडशिप बँड, ग्रीटिंग कार्ड्स, छोट्या भेटवस्तू, आणि भावनिक संदेश देऊन आपले प्रेम व्यक्त केले जाते. अनेकजण जुन्या आठवणी जागवण्यासाठी मित्रांना भेटतात, गेट-टुगेदर आयोजित करतात व आपल्या मैत्रीला अधिक बळ देतात. यंदा फ्रेंडशिप डेच्या निमित्ताने स्थानिक बाजारपेठांमध्ये आणि ऑनलाइन शॉपिंग साइट्सवर विविध भेटवस्तूंना मोठी मागणी आहे. बाजारात फ्रेंडशिप बँड, फ्रेंडशिप रिंग्स, कीचेन, कुशन, फोटो फ्रेम्स, टी-शर्ट, मग्स, चॉकलेट बॉक्सेस, आणि पर्सनलाइज्ड गिफ्ट्स यांची भरभरून खरेदी केली जात आहे. विशेषतः कॉलेजमधील तरुणाईमध्ये फ्रेंडशिप बँड्सची परंपरा आजही कायम आहे. त्यामुळे ग्राहकांनी आधीच खरेदीसाठी गर्दी केली आहे. या दिवशी केवळ भेटवस्तूंमुळे नव्हे, तर एकमेकांसोबत घालवलेल्या क्षणांमुळे मैत्री अधिक बहरते. त्यामुळे या फ्रेंडशिप डे ला नवी मुंबईत मैत्रीचा जल्लोष अनुभवायला मिळणार, हे निश्चित!
...........
दहा ते दोनशे रुपयांपासून विक्री
स्थानिक गिफ्ट शॉप्स, स्टेशनरी दुकाने, तसेच सोशल मीडियाच्या माध्यमातून होणाऱ्या हँडमेड वस्तूंच्या विक्रीलाही चांगला प्रतिसाद मिळत आहे. या वस्तूंमध्ये वैयक्तिक नावे असलेले बँड्स, मैत्रीसंदेश असलेली कार्ड, फोटो प्रिंटेड टी-शर्ट्स आदी वस्तू मोठ्या प्रमाणावर उपलब्ध आहेत. यावेळी स्थानिक गिफ्ट दुकानदार नारायण चौधरी म्हणाले की, यंदा दहा रुपयांपासून दोनशे रुपयांपर्यंतच्या फ्रेंडशिप बँड्स व भेटवस्तूंना मागणी आहे. विशेषतः हँडमेड फ्रेंडशिप बँड्सना अधिक पसंती मिळत आहे. ऑनलाइन शॉपिंग साइट्सवरही या निमित्ताने विशेष सवलती जाहीर करण्यात आल्या आहेत.