उड्डाणपुलाखालील सेवा रस्त्याची दोन महिन्यात चाळण

उड्डाणपुलाखालील सेवा रस्त्याची दोन महिन्यात चाळण
तारापूर, ता. ३१ (बातमीदार) ः वाणगाव रेल्वे उड्डाणपुलाखालील सेवा रस्त्यावर पावसाळ्यात मोठे खड्डे पडल्याने चाळण झाली आहे. मुख्य बाजारपेठेत ये-जा करण्यासाठी एकमेव सेवा रस्त्याचा पर्याय असून दुरवस्थेमुळे नागरिकांना चिखलातून वाट काढावी लागत आहे.
वाणगाव उड्डाणपुलाचे वर्षभरापूर्वी काम पूर्ण झाल्यानंतर पश्चिम रेल्वे मार्गावरील फाटक बंद करून पूर्व पश्चिम वाहतूक उड्डाणपुलावरून सुरु करण्यात आली. उड्डाणपुलाच्या बांधकामावेळी दुरवस्था झालेल्या दोन्ही बाजूंच्या रस्त्याचे सार्वजनिक बांधकाम विभागाकडून नव्याने डांबरीकरण करण्यात आले होते. मात्र, वाणगाव नाका येथील सेवा रस्ता अवघ्या एका वर्षातच उखडला असून जागोजागी खड्डे पडले आहेत. यामध्ये पावसाचे पाणी साचल्याने वाहनचालकांना खड्ड्यांचा अंदाज येत नसून अपघाताची भीती निर्माण झाली आहेत.

खड्डे भरण्यासाठी चिखल मातीचा वापर
सेवा रस्त्याच्या दुरवस्थेविरोधात स्थानिक नागरिकांनी तक्रार दिल्यानंतर ठेकेदाराने खड्डे भरण्यासाठी चिखल मातीचा वापर केल्याने हा भाग निसरडा झाला असून वाहतुकीसाठी अधिकच धोकादायक बनला आहे. वाणगाव नाका येथील रेल्वे उड्डाणपुलाखालील सेवा रस्त्यावरील खड्डे तत्काळ भरण्यासाठी संबंधित ठेकेदाराला आदेश दिले आहेत, असे उपविभागीय अभियंता नितीन पगारे यांनी सांगितले आहे.

गेल्या आठ दिवसापासून सार्वजनिक बांधकाम विभागाला तक्रार करूनही रस्त्यावरती पडलेले खड्डे बुजवत नव्हते. मात्र, आज त्यांनी चिखलयुक्त माती व मोठ्या दगडाची भरणी केल्याने त्यामध्ये अपघात होऊन एखादी गंभीर घटना घडण्याची शक्यता आहे.
- योगेश काळे, वानगाव ग्रामस्थ