खड्ड्यांमुळे ट्रकचा विचित्र अपघात

खड्ड्यांमुळे ट्रकचा विचित्र अपघात
भिवंडी, ता. १ (वार्ताहर) : मुंबई-नाशिक महामार्गावर पडलेल्या खड्ड्यांमुळे शुक्रवारी (ता. १) ट्रकचा विचित्र अपघात होऊन ट्रकवरील ट्रॉली उलटली. चिंचवली फाट्याजवळ खड्ड्यांमध्ये ट्रक आदळल्याने ही ट्रॉली कोसळली तर ट्रकचा पुढील काही भाग काही अंतरावर जाऊन थांबला. हा ट्रक वाड्याहून उडिशाच्‍या दिशेने जात होता. या ट्रकमध्ये मोठ्या प्रमाणात लोखंडाचे भंगार ठेवण्यात आले होते. या अपघातामुळे मुंबई-नाशिक महामार्गावर काही काळ वाहतूक कोंडी झाली होती. सुदैवाने या अपघातामध्ये कोणीही जखमी झाले नाही; परंतु मुंबई-नाशिक महामार्गावर पडलेल्या खड्ड्यांमुळे दिवसेंदिवस अपघाताचे प्रमाण वाढत असल्याचे स्थानिकांनी सांगितले.