जुहू बीचवर समुद्रात दोघे बुडाले

जुहू बीचवर समुद्रात दोघे बुडाले
एकाचा जीव वाचला, दुसरा बेपत्ता
सकाळ वृत्तसेवा
मुंबई, ता. १ : जुहू येथील सिल्व्हर बीचजवळील गोदरेज गेट परिसरात शुक्रवारी (ता. १) सकाळी दोन तरुण समुद्रात बुडाले. दोन युवक समुद्रात पोहत असताना अंदाजे २०० मीटर आत गेले होते. त्यापैकी एकाचा जीव वाचवण्यात आला असून, दुसरा युवक अद्यापही बेपत्ता असल्याची माहिती अग्निशमन दलाकडून देण्यात आली.
मुंबई महापालिकेच्या अग्निशमन विभागाने दिलेल्या माहितीनुसार, राजकुमार गोविंद सुब्बा (वय २२) या युवकाला ‘दृष्टी’ लाइफगार्ड जितेंद्र तांडेल यांनी अग्निशमन दल येण्यापूर्वीच समुद्रातून बाहेर काढून जीव वाचवला, तर दुसरा तरुण विघ्नेश मुरुगेश देवेंद्रन (वय २०) हा मात्र खोलवर बुडाल्याने अद्याप बेपत्ता आहे. घटनास्थळी तत्काळ शोधमोहीम सुरू करण्यात आली; मात्र दुपारी १.४६ वाजता समुद्रात भरतीमुळे शोधकार्य थांबवावे लागले, असे अग्निशमन दलाकडून सांगण्यात आले. दरम्यान, स्थानिक पोलिस व आपत्कालीन यंत्रणा अधिक तपास करीत आहेत. समुद्रकिनाऱ्यावर फिरणाऱ्यांना खबरदारी घेण्याचे आवाहन प्रशासनाने केले आहे.
..........