डोंबिवलीची करिष्मा मिस ग्लोबल इंडिया

डोंबिवलीची करिष्मा ठरली ‘मिस ग्लोबल इंडिया’
कल्याण, ता. १ (बातमीदार) : डोंबिवलीतील आंतरराष्ट्रीय बॅडमिंटनपटू व नामांकित मेकअप आर्टिस्ट करिष्मा खर्डीकर हिला नुकत्याच पार पडलेल्या मिस ग्लोबल इंडिया २०२५ सौंदर्य स्पर्धेच्या विजेतेपदाने गौरविण्यात आले. सुप्रसिद्ध गायक उदित नारायण यांच्या हस्ते करिष्माला रत्नजडित मुकुट, सॅश आणि सन्मानचिन्ह प्रदान करून गौरवण्यात आले. मुंबईत झालेल्या या राष्ट्रीय स्तरावरील स्पर्धेत दिल्ली, उत्तरप्रदेश, झारखंड, ओरिसा, पंजाब अशा विविध राज्यांतील स्पर्धकांचा सहभाग होता. त्यातून करिष्माने सर्वोत्तम कामगिरी करत विजेतेपद पटकावले आणि डोंबिवलीच्या शिरपेचात मानाचा तुरा खोवला.
करिष्मा खर्डीकर ही केवळ सौंदर्य स्पर्धेची विजेतीच नाही, तर ती एक आंतरराष्ट्रीय दर्जाची बॅडमिंटनपटू देखील आहे. कतारमध्ये झालेली आंतरराष्ट्रीय स्पर्धा जिंकण्याचा मान तिने पटकावला असून, तिने १० हून अधिक वेळा भारताचे प्रतिनिधित्व केले आहे. तिची डबल्स वर्ल्ड रँकिंग १६२वा क्रमांक आहे, तर राज्यस्तरीय स्पर्धांमध्ये तिने ४ वेळा विजेतेपद मिळवले आहे. आज माझ्या डोक्यावर सन्मानाचा मुकुट आहे याचा मला खूप अभिमान वाटतो. कोणत्याही क्षेत्रात यश मिळवायचे असेल तर फिटनेस अत्यंत महत्त्वाचा आहे. भविष्यात कल्याण-डोंबिवलीतील खेळाडूंकरिता काहीतरी विशेष करण्याचा निर्धार केला आहे,” असे भावनिक वक्तव्य करिष्माने यावेळी केले. करिष्माच्या या यशाबद्दल डोंबिवलीकरांकडून तिला मोठ्या प्रमाणात शुभेच्छा मिळत आहेत. तिचा बहुआयामी प्रवास तरुण पिढीला प्रेरणादायक ठरत आहे.