मौल्यवान धातू चोरणारा अटकेत

नवी मुंबई, ता. २ (वार्ताहर) : पावणे एमआयडीसीतील हिंदुस्तान प्लॅटिनम प्रायव्हेट लिमिटेड कंपनीतून ११ लाखांचा पॅलेडीयम मौल्यवान धातू चोरण्यात आला होता. या प्रकरणात कंपनीच्या कर्मचाऱ्याचा सहभाग असल्याचे उघड झाले आहे.
पावणे एमआयडीसीतील हिंदुस्तान प्लॅटिनम प्रायव्हेट लिमिटेड कंपनीमध्ये पेलेडीयम, रोडीयम, रुथीनियम अशा मौल्यवान धातूंवर प्रक्रिया केली जाते. यानंतर हे धातू पाठवण्यापूर्वीची निगराणी करण्याची जबाबदारी सुपरवायझर म्हणून कामाला असलेल्या अनिल भालेकर याच्यावर होती. बुधवारी (ता. ३० जुलै) सायंकाळी अनिलने पँटच्या आतील भागात ३०० ग्रॅम वजनाचे पेलेडीयम घेऊन जाण्याचा प्रयत्न केला; पण कंपनीच्या सीसीटीव्हीमध्ये ही संशयास्पद हालचाल निदर्शनास आल्यामुळे सुरक्षा अधिकाऱ्यांनी भालेकर याची झडती घेतली. या वेळी तब्बल ११ लाख रुपये किमतीचा ३०० ग्रॅम वजनाचा पॅलेडीयम धातू आढळला. या प्रकरणात तुर्भे एमआयडीसी पोलिसांनी गुन्हा दाखल करून अटकेची कारवाई केली आहे.