मरणानंतरही वाट खडतर

मरणानंतरही वाट खडतर
कल्याण पूर्वेतील रस्ते चिखलमय; अंत्यविधीत स्थानिकांना अडचणी

सकाळ वृत्तसेवा
डोंबिवली, ता. २ : कल्याण-डोंबिवलीतील रस्त्यांवर खड्डे पडल्याने रस्त्यांची दुरवस्था झाली आहे. यामुळे नागरिक आणि वाहनचालक त्रस्त झाले आहेत. खड्ड्यांवरून नागरिकांचा संताप अनावर होत आहे. कल्याण पूर्वेतील एका इमारतीच्या समाेर चिखलाची वाट आहे. त्या ठिकाणी रस्ता नाही. या चिखलाच्या वाटेमुळे एका आजीच्या पार्थिवाला तिच्या नातेवाइकांना खांदा देता आला नाही. अखेरीस शववाहिनीतून आजीबाईचे पार्थिव स्मशानात नेण्याची वेळ तिच्या नातेवाइकांवर ओढावली. याबद्दल इमारतीतील रहिवाशांसह आजीच्या नातेवाइकांनी तीव्र संताप व्यक्त केला आहे. इमारतीसमोर रस्ता महापालिका कधी करणार आहे, असा सवाल उपस्थित केला आहे.

कल्याण पूर्वेतील जाईबाई शाळेजवळ ओम श्री सुदर्शन इमारत आहे. या इमारतीच्या समाेरून जाणारा रस्ता मुख्य रस्त्याला मिळताे. या इमारतीसमोरचा रस्ता तयार केलेला नाही. हा रस्ता कच्चा असल्याने तो मातीचा आहे. पावसाळ्यात रस्त्यावर पूर्ण चिखल झाला आहे. या चिखलातूनच इमारतीमधील रहिवासी ये-जा करतात. या चिखलमय रस्त्याने नागरिक त्रस्त असताना इमारतीमधील रहिवासी दीपक लोखंडे यांच्या आई विमल लोखंडे यांचे निधन झाले. त्यांच्या निधनानंंतर स्मशानभूमीत पार्थिव नेण्यापूर्वी घरासमोर विधी केला जातो. त्या ठिकाणी जागा नसल्याने त्यांना रस्त्यावर विधी करावा लागला. रस्त्यावर चिखल असल्याने त्यांच्यावर चिखलात लाकडी फळ्या टाकून विधी करण्याची वेळ आली. कसाबसा विधी आटोपला, मात्र आजीचे पार्थिव तिरडीवरून घेऊन जाणे शक्य नव्हते. त्यामुळे आजीबाईच्या नातेवाइकांना शववाहिनीतून पार्थिव स्मशानात घेऊन जावे लागले. रस्त्यावरील चिखलामुळे आजीच्या पार्थिवाला नातेवाइकांना खांदा देता आला नाही. या घटनेचा इमारतीमधील रहिवासी आणि आजीच्या नातेवाइकांनी तीव्र शब्दांत निषेध व्यक्त केला आहे.

इमारतीचे माजी सचिव सुजित श्रीवास्तव यांनी सांगितले, की आज इमारतीत एका आजीचे निधन झाले. त्यांचे पार्थिव ठेवण्यासाठी जागा नव्हती. चिखलात लाकडी फळ्या टाकून त्या ठिकाणी विधी करावा लागला. चिखलातून अंत्ययात्रा जाऊ शकत नव्हती. शववाहिनी आणावी लागली. आमची समस्या महापालिकेने आता तरी सोडवावी.

आंदोलनाचा इशारा
रस्ता व्हावा, यासाठी सातत्याने पाठपुरावा करणारे सचिन आळंगे यांनी सांगितले, की इमारतीसमोरच्या रस्त्याची दुरवस्था झाली आहे. रस्ता तयार केलेला नाही. महापालिका, स्थानिक आमदार, खासदारांनी या ठिकाणी सिमेंटचा रस्ता तयार करावा. त्या ठिकाणी रहिवासी राहतात. विद्यार्थी क्लासला जातात. दुचाकी चालकांची दुचाकी घसरून अपघात होत आहे. आज तर कहरच झाला. आजीच्या पार्थिवाला नातेवाइकांना खांदा देता आला नाही. ही अत्यंत निषेधार्थ बाब आहे. आता तरी महापालिकेने आमच्या मागणीची दखल घेऊन रस्ता तयार करावा अन्यथा आम्हाला महापालिकेच्या विरोधात आंदोलन करावे लागेल.