नागरीवस्तीत माकडांचा धुमाकूळ

नागरीवस्तीत माकडांचा धुमाकूळ
मुरुडलगतच्या गावांमध्ये मुक्तसंचार, दहशतीचे वातावरण
मुरुड, ता.२ (बातमीदार)ः शहरालगतच्या गावांलगत असलेल्या डोंगर रांगा तसेच फणसाड अभयारण्यांमुळे वन्यजीवांचा वावर मुरुड परिसरात आहे. पण जंगलात खाद्य नसल्याने आठवडाभरापासून नागरीवस्तीत माकडांनी मुक्काम ठोकला आहे.
वावडुंगी, सायगाव, नवीवाडी, शिघ्रे गावातील ग्रामस्थ सध्या माकडांच्या उपद्रवाने त्रस्त आहेत. बागायती वाड्यांत माकडांची टोळी धुडगुस घालत आहेत. नवीवाडी परिसरात नदी परिराताली झाडांवर मुक्तसंचार करताना बागांमधील पपई, केळी यांची मोठ्याप्रमाणावर नासधुस झाली आहे. त्यामुळे शेतकरी हवालदिल झाले आहे. नवी वाडीचे संदीप मांदाडकर तसेच रत्ना बागुल यांच्या वाडीतील पपई, केळी माकडांनी फस्त केली आहेत. तसेच फांद्यांची मोडतोड केली आहे. तर गणेशआळीत घरांवरील पत्र्यावर उड्या घेत मर्कटलिला सुरू असल्याने नागरिकांमध्ये भीतीचे वातावरण आहे. यासंदर्भात वनविभागाचे अधिकारी राहुल कुळकर्णी यांच्याशी संपर्क साधला असता माकडांच्या त्रासाबद्दल माहिती मिळाली असून उपाययोजना करणार असल्याचे सांगितले.